- Kammalaatersornerujussuaq aviisimi ukiuni kingullerni uteqattaarlugu ima allaaserisaqattaartigaa, akisuatilerlugulusooq, tamannalu oqallinnerujussuarmik kamannermillu pilersitsivoq, Journalistforbundip siulittaasua Mogens Blicher Bjerregård ilaatigut taama oqarpoq.
Ullaaq manna Elna Egede oqaloqatigaarput.
- Soorunami tulluusimaarnaqaaq nuanneqaaq, Elna Egede oqarpoq.
Aperaarput tunngavilersuutigineqarsimasut illunik attartortumiit piginnittuuneq pillugu oqaluttuaq qanoq ililluni nassaarisimaneraa.
- Taamanikkut inatsisartut inigisamik tunisineq ”lejer til ejer ordning” pillugu allanngortinniarlugu sammivaat. Misissuininnilu takusinnaasimavara ilanngussimanngisaminnik naatsorsuusiortoqarsimasoq, taannalu pissarsiarivara. Kingorna illut tamaasa ataasiakkaarlugit takusartaqattaarpakka nalugakkimmi qanorpiaq innerat. Taava taamaalillugit AG-mi assilineqarnikuupput eqquillugit illut aqqanillit eqqunngitsumik tunngaveqarluni tunineqarsimasut ullumikkullu saqqummiunneqartut, taama oqarpoq tusagassiortoq Elna Egede.