Ellemann-Jensenip Michael Binzer taperserpaa

- Kalaallit Nunaanni naalakkersuinikkut ingerlatsinerup aamma inuussutissarsiornerup akuleriissinneqarnerat isumakulunnaqaaq. Aviisimut Politikenimut ullumikkut taama oqaaseqarpoq Danmarkimi siornatigut nunanut allanut ministeriusimasoq Uffe Ellemann-Jensen.
Allattoq Elisa Isaksen
apriilip 07-at 2008 05:28

- Tamatuma kinguneranik kalaallit piginnaaneqarluartut imaluunniit inuit pikkorissut, piginnaanerminnik tamakkiisumik atuineq ajorput. Ajornartorsiut tamanna kalaallit iliuuseqarfigisariaqarpaat, Ellemann-Jensen oqarpoq.

Uffe Ellemann-Jensenip Air Greenlandip pisortaanerata Michael Binzerip isornartorsiuinera taperserpaa, taassuma oqaatigimmagu inuit kikkut ilisarisimanerat apeqqutaatillugu imaluunniit partiimut sorlermut ilaasortaanerat apeqqutaatillugu toqqarneqartarnerat.

- Namminersornerullutik Oqartussat suliffeqarfiutaanni ilaquttanik ilisarisimasanillu toqqaasarneq inuiaqatigiinnut hunnoruju miliuuninik arlalinnik naleqareerpoq. Pisimasut arlallit qiviaannarneqarsinnaapput, soorlu siornatigut naalakkersuisunut siulittaasuusimasup Lars-Emil Johansenip akuuffigisimasaanni naalakkersuinikkut ikinngutinik sullissineq aningaasarpassuarnik akeqarsimavoq. Assersuutigalugu KNI-mut atatillugu 250 miliuunit koruunit annaaneqarput, Michael Binzer Politikenimut oqarpoq.

- Tassa akileraartartut aningaasaataat atulussinnarneqarput, tamannalu pinngitsoorneqarsinnaagaluarpoq, tamatumunngami piginnaanikinneq pissutaammat. Kalaallit Nunaat inuiaqatigiittut namminersortutut ingerlanneqassappat ilaquttanik ilisarisimasanillu salliutitsineq allanngortinneqartariaqarpoq, Michael Binzer taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq