Nunatsinni timmisartukkut angallassineq periarfissagissaarnerusoq
Taamaalioraanni timmisartortitseqatigiiffiit maanga utimullu aqqutinik nutaanik ammaanialerneri tamaasa nutaanik qinnuteqaasiortassanngikkaluarput, Arni Gunnarsoq oqarpoq.
Taassuma unnersuussutigaa Europami isumaqatigiissut taasartagaat open sky, isumaqatigiissutip taama ittup timmisartortitseqatigiiffiit periarfissittarpai aqqutinik nutaanik nunanut EU-mut ilaasortaasunut, Norge Islandilu ilanngullugit ammaanissanut.
- Isumaqarpunga isumaqatigiissut taama ittoq Europamut tamarmut iluaqutaasoq, iluaqutaassagaluarporlu Kalaallit Nunaat tassunga ilannguttuuppat.
Europamiut open sky aqqutigalugu isumaqatigiissutaannut Kalaallit Nunaat ilanngukkaluarpat kingunerissagaluarpaa, europamiut timmisartortitseqatigiiffii ajornannginnerusumik Kalaallit Nunaanni illoqarfinnut amerlanernut aqqutinik ammaassisinnaalernerat.
Sydbankimi timmisartortitsinermik paasiniaaqqissaartartoq Jacob Pedersen isumaqarpoq isumaqatigiissut taama ittoq europamiut timmisartortitseqatigiiffiinut atuisunullu iluaqutaasimasoq.
- Qularinngilluinnarpara tamanna timmisartortitseqatigiiffinnut oqilisaataasoq, tamakkulu oqittorsioraangamik timmisartortitseqatigiit iluanaarluarnissaminnut periarfissaqarnerulaalersarput, taamaalillutillu aqqutinik amerlanerusunik ammaasinnaanngorlutik, Jakob Pedersen Jonas Fievémut oqarpoq.