Egyptenimi inatsisartut suiaassusermut innimiilliorneq pillugu inatsisiliornialerput
Inatsit pilersinneqassaaq arnat arnaanerat pillugu naapertuilluanngitsuliorfigineqartarnerisa annertuserujussuarnerisa kingorna; Egyptenimi angutit inuiaqatigiinni salliutinneqartorujussuupput.
Suiaassusermut innimiilliortarneq pillugu Egyptenimi inatsiseqarsimanngisaannarpoq. Taamaattoqalernissaali arnat sivisoqisumik qilanaarisimavaat. Ingammik nunami tassani naalakkersuinikkut aaqqissuussinikkut arnat annerusumik piginnaatitaaffeqalersussanngormata.
Inatsisissatut siunnersuut saqqummiunneqaqqammerpoq, suiaassusermut innimiilliornerit annertuut ukiut qulit angullugit paarnaarunneqarnermik kinguneqarsinnaapput, suliffeqarfinni atuarfinnilu innimiilliornerit ukiut tallimat angullugit parnaarunneqaataasinnaallutik.
Piffissanngorsimavoq pinerluttulerinermut inatsimmiilernissaa, ukiunimi pingasuni kingullerni tamat najortangaanni arnat nakuuserfigineqartarnerat annertuserujussuarsimavoq.
Eqqungaasut ilaat qanittukkut Egyptenip tv-atigut saqqummerpoq.
Aqqusinermi arnaq tusagassiortoq angummit tinguneqariaraluarsimavoq. Unnerlummat angutaa tamatumunnga oqarsimavoq "nammineq pisuussutigisimassangaa".
- Ajuallannaannanngilaq. Eqqissillungaana aqqusinermiissinnaannginnera piginga, arnaq Egyptenip tv-anut oqarpoq.
Cairop universitetiani qaammatip siuliani pisimasup ersersippaa angutit arnanut pissusilersuutigisartangaasa allanngortittariaqassusia.
Tassani arnaq akutaq takkuppoq, nasartaateqarluni, aappaluartumik kiaserluni qernertunillu qarleqarluni.
Suiaassuserminut innimiilliortoqarnera Universitetimut naammagittaalliutigimmagu pisortaa akisimavoq arnaq taanna allatut atisalersuinnarsimasinnaasoq.
