Efterskolet siunissaqartitsipput
Efterskolit pillugit Kalaallit Nunaanni aaqqissuussineq siunissaqarluarpoq. Efterskoliugallartut forstanderii, højskolillu forstanderii Qasigiannguanilu efterskolissap forstanderia KIIIN-ilu tassa Kulturimut ilisimatusarnermut Ilinniartitaanermut Ilageeqarnermullu naalakkersuisoqarfik ulluni marlunni isumasioqatigeereerlutik taama inerniliipput.
oktobarip 13-at 2008 17:03
Efterskolersinnaanissap inuusuttunut 14-it 17-illu akornanni ukiulinnut neqeroorutaalluartuunera isumasioqatigiit isumaqatigiissutigaat, iluatsilluartutullu nalilerneqarpoq, inuusuttut ilinniaqqinnissaannut aqqutissatsialattut nalilerneqarluni.
- Efterskolit pillugit aaqqissuusseqqinneq immikkuullarippoq, inuusuttut suliamut tungatillugu ineriartorluarnissaat pikkorissinerunissaallu periarfissaalissammat, aamma inuttut ineriartorluarnerunissaat taamaalillugu qulakkeerneqassaaq, forstanderit isumasioqatigeereerlutik taama naliliipput.
Efterskolimut inissat 200-nik ilanissaat forstanderit siunnersuutigaattaaq, taamalu Qasigiannguani efterskolip saniatigut inissanik ujartuillutik.
