Efterskolertoq hashimik arnaminut nassiussivoq
Imaluunniit eqqornerusumik oqaatigalugu, piffissap sivikitsup ingerlanerani pingasoriarluni nassiussarsisarsimavoq. Atuagagdliutini ullumi saqqummersuni tamanna allaaserineqarpoq.
Ilanngaaserisulli qimmiata silappaarissup poortukkat pingasut Nuummi allakkerisarfimmi nassaarai, politiit ikiaroornartulerisuisa pisortaat, Finn Jeppesen, ilisimatitsivoq. Transistorradiot mikisut, tamarmik hashimik 100 grammi sinnilaarlugu imallit, politiit ilanngaaserisullu poortukkani aamma nassaaraat.
Poortukkat tamarmik sapaatip-akunnerani kingullermi nassiussaapput. Arnaq politiinit tallimanngormat aaneqarpoq, ingerlaannarlu nassuerpoq ernini hashimik Nuummut nassitsisittarsimagini. Arnap akiliisinneqarnissani, pinerluuteqaqqikkunilu eqqartuunneqarnissani, naatsorsuutigissavaa.
Nukappiaraq qanoq pineqassanersoq suli ilisimaneqanngilaq. Tamanna Danmarkimi politiinit inunnillu isumaginnittunit aalajangerneqassasoq, politiit Atuagagdliutinut ilisimatitsissutigaat.
