Efterskolerniartussarpassuarnut piareersaaneq amigarineqarpoq
Nunatsinni meeqqat atuarfiini siunnersortit Namminersornerullutik Oqartussat maanna sakkortuumik isornartorsiorpaat Namminersornerullutik Oqartussat nalunaarutaat aamma efterskolerniarluni qinnuteqarnermi immersugassaq suli piareerneqanngimmata.
Meeqqat Atuarfiini siunnersortit sapaatip-akunnera una Sisimiuni isumasioqatigiipput, upernaarulu 2008-mi ukioqatigiiaat assigiinngitsut marluk meeqqat Atuarfiat naammassisussaammassuk siunnersortit naammagittaalliorput.
Aasamut Danmarkimi nunatsinnilu efterskolerniarlutik qinnuteqartut marloriaatinngornissaat naatsorsuutigineqarpoq, taamaattorli qinnuteqarnissamut killiliunneqartumut qaammatit marluinnanngorneranni tapiinissamut allannguutit nutaat immersugassallu suli piareerneqanngillat.
Siunnersortit tamanna atuartunut, angajoqqaanut ajuusaarnartutut taavaat.
- Ajuusaarnarpoq siunnersortitut atuartunut angajoqqaanullu efterskolernissamut piumasaqaatinik paasissutissanillu tamakkiisunik ilisimatitsisinnaannginnatta. Allaffissornikkut siunertarisat aamma Namminersornerullutik Oqartussat Atuarfitsialammut tunngatillugu meeqqat atuarfiannut piumasarisaannut naapertuutinnginnerat allaassuteqartorujussuusut, siunnersortit isumasioqatigiittut allapput.
