Efterskolemut qinnuteqartut 174-it inissaqalerput

Itigartitaasussalli ingerlaqqitsinnissaat qulakkeerniarlugu Maniitsumi, Kangerlussuarmi Sisimiunilu immikkut ittumik efterskolertitsinissaq maanna periarfissiuunneqarpoq. Naalakkersuisoqarfimmi atuartitaanermut nakkutilliisoq Kaali Olsen ima nassuiaavoq:

- Suliniutigaarput suli naammassivinngitsumik ilaasa 80-it isertitsiugallartumi Kangerlussuarmiittumi efterskolertinnissaat, allat 54-it Knud Rasmussenip Højskoliani inissaqartinneqarnissaat kiisalu Maniitsumi 40-t efterskolertinnissaat, Kaali Olsen nassuiaavoq.

Inuusuttut katillutik 174-it taamaalillutik inissaqalissasut oqaatigai.

- Naaggaarneqartariaqartut immaqa 0-nngupajaassasut neriuutigaarput. Danmarkimi tigutittut amerlanerupput (maannamut 400-t, aaqq.) Qaqortumi efterskolernissamut qinnteqarsimagaluartut ilai utoqqaavallaaramik, 18-ileereernikuugamik, itigartitaasussaapput, Kaali Olsen oqarpoq.

18-ileersimanertik pissutigalugu itigartitaasussat 40-t missaanniissangatippai.

- Neriuppugulli, pilersaarutigut iluarsissappata, qinnuteqartut ilinnialernermillu aallartitsinngitsut tamarluinnangajammik efterskolersinnaassasut, oqarpoq.

Maaji naalluinnalereeraluartoq, ulaappunnermut pissutaavoq nunatsinni efterskolerniarlutik qinnuteqartut ilimagisamit amerlanerujussuusimammata.

- Naatsorsuutigineqartaraluarpoq efterskolerniartut tassaasartut nunani allani misilittagaqarusuttut, paasivarput nunatsinni efterskolernissamut soqutiginninneq annertoorujussuusoq.

Aningaasaliissutissanik periarfissanillu ujaasinerit maannamut piffissamik atuiffiungaatsiarpoq.

- Eqqaamanerlunngikkukku immikkut ittumik efterskolertitsinissat 22 millioni koruunit missaannik akeqassaaq. Efterskolertitsissanerluta ulluni qaninnerni paasissavarput, Kaali Olsen oqarpoq.

Kaali Olsenip oqaatigaa aningaasaliissutissat inatsisartut aningaasaqarnermut ataatsimiititaliaata qanittukkut ataatsimiissutigissagai.

Danmarkimi efterskolertussat 400-pput.

Qaqortup efterskolessaani ilinniartitsisutut qinnuteqartut ima amerlatigisimapput allaat nutaassani ilinniartitsisuulernissaminnut piareeqqallutik.