Nuummi saassussinernut takunnissimasussarsiortoqartoq
Nuummi Radiofjeldip nalaani arnat marluk ilisarisimanngisaminnit marlunngornermi unnuap qeqqata missaani saassunneqarput. Arnap aappaata saassunneqarnerata nalaani takunnittut arnamut ikiuupput angullu sumiiffigisamiit qimaguppoq. Arnaq alla sumiiffigisap qanittuani sivitsunngitsoq aamma saassunneqarpoq.
Politiit saassunneqartup aappaa oqaloqatigaat saassunneqartorli siulleq takunnittullu arnamut ikiuisut, politiinut pingasunngornermi ualisoq nalunaaruteqarsimanngillat.
Pisoq nalinginnaanngitsoq
Nunatsinni aqqusiinnarmi taama saassussisoqarnera nalinginnaanngitsorujussuummat pisoq politiit ulapputigigaat, piareersimasut ittuat, Mads Lynge paasissutissiivoq.
- Taama nalaassisoqartarnera nalinginnaanngitsorujussuuvoq taamaammat suliaq ulapputigaarput, piareersimasut ittuat oqarpoq. Taassuma takunnissimasut saassunneqartorlu siulleq politiinut nalunaaruteqaqquai.
Politiit angut saassussisoq ima nassuiaaserpaat:
Angut kalaaleq 20-t 30-llu akornanni ukioqassangatinneqarpoq, tuattuuvoq, sungiusarluni qarlinnik atugaqarsinnaallunilu nammattagaqarpoq. Angut qaqortunik tungortumillu qaamasumik tulleriiaartunik qalipaatilimmik nuersakkamik nasaqarpoq.
Arnaq siulleq saassunneqartoq angullu arnamut ikiuisoq ima nassuaatigineqarput:
Arnaq kalaaleq 165 centimeterip missaannik angissusilik, ukiui ilisimaneqanngillat, aappilorujuttumik qiviunik oqorsaasikkamik kavaajaqarpoq, aappalorujuttumillu nivingataartumik qilertilimmik nasalik.
Angut saassussisoqarnerani ikiuuttooq kalaaliuvoq, ukiui ilisimaneqanngillat, 165 centimeterit missaannik angissuseqarpoq taartunillu atisaqarluni.
Allagaq siammarterneqarluartoq
Saassunneqartup aappaata qatanngutaata Jakobine Motzfeldtip, politiinit oqaloqateqareersimasup, qatanngutini saassussisumit qanoq toqqusassinneqarsimanera kiinaasigullu tilluarneqarsimanera saassussisullu qimaanera Facebookimi quppernermini oqaluttuaraa.
Taassumap takunnissimasut politiinut saaffiginneqqullugit innersuussutigaa, taamaalilluni saassussisoq nassaarineqarsinnaaniassammat. Jakobinep facebookimi allagaa pingasunngornermi ualikkut 550-init amerlanerusunit siammarterneqarsimavoq.
Allagaq KNR-ikkut ilanngunnissaanut akuerineqarpugut uanilu atuarsinnaavat:
