Efa Lynge toquvoq

Efa Nuummi inunngorpoq ukioq 1944, juulliaqqami.

Tusagassiorneq soqutigisarigamiuk realskolimi naammassigami tusagassiortunngorniarluni radioaviisimi ilinniartuuvoq, ukiorpassuarnilu KNR-ip nutaarsiassaqartitsiviani, kingornalu aamma kultureqarnermut aliikkutassaqartitsinermullu immikkoortortaani sulilluni.

Efa timersornermik soqutigisaqarluartuuvoq, timersuutinillu ilisimasaqarluarluni. Taamaattumik Kalaallit Nunaata Radioa timersornernit, soorlu nunarput tamakkerlugu pissartanngorniuunnernit, aallakaatitsissatillugu Efa ukiorpassuarni kisimi toqqammaviusarpoq. Efamummi apeqqutaanngilaq sisorartuunersut, arsartuunersut arsaattuunersulluunniit. Timersuutimmi taakku tamaasami ilisimasaqarfigai, taakkuninngalu aallussisut inuttaat ilisarisimalluarlugit. Taamaakkami sineriassuatsinni timersortartunik ikunnguterpassuaqarpoq.

Efa qatituumik nipeqarpoq, radiukkullu oqalussatillugu teknikerit oqartarput allakaatitsissut ”efalatorilerniarlugu”, tassagooq nipigissaataatigut nipaa qataalligaat.

Efa suleqatikkuminartuuvoq, inussiarnersuullunilu, aallakaatitassiortoqatinilu siunertalimmik isornartorsiorsinnaasarpai, iluarisaminillu aallakaatitassiortoqarsimagaangat nersualaartarlugit.

Efa nipilersornermittaaq soqutigisaqartuuvoq, namminerlu guitari aallutaralugu. Nipilersoriaatsinit nuannarisaasa ilagaat jazz.

Efa Lynge nappaammit qaangersinnaanngisaminit eqqorneqarnermigut akornatsinniikkunnaarpoq, puigorneqarnavianngilarli.

Eqqaaneqarnera ataqqinartuuli!