Eeeq uumasuminngooq taqassinartoqarpoq

Qangarsuarli oqaluttuatut oqaluttuarineqartaannarpoq uumasoq eqqumiitsumik taqassinassusilik inummullu eqqaanarsinnaasoq yeti-mik taaneqartartoq Himalayap qaqqarsuini najugaqartartoq, immikkut ilisimasallit Tuluit Nunaanni Oxford Universitetimeersut maanna oqaatigaat taanna kingumut takkuteqqissimasoq.
juulip 29-at 2008 07:11

Immikkut ilisimasallit misissueriaaseq DNA atorlugu misissuereerlutik paasivaat uumasup eqqumiitsup meqquinik Indiap avannaaneersunik nassaarsimallutik.

Amerlasuut nalugunanngilaat aviiseeqqami titartakkami Tintinimi oqaluttuarineqartarmat Tibet-imi uumasoq taqassinartoq. Maannalu tassa eqqartorneqartalerpoq, taanna nunarsuarmi piviusutut maanna saqqummersimasoq.

Ilisimatuut oqaatigaat, paasisat kingulliit inernerisa paasinarsisikkaat meqqut nassaarineqartut takornartaalluinnartuusut uumasunilu allani nassaarineqarsimanngisaannartut.

Uumasoq eqqumiitsoq taanna Yeti, oqaatigineqarsinnaavoq affarmik inuusoq affarmillu aapakaajulluni 3 meterillu missaannik angissuseqarluni. Siullermik malugineqaqqaarpoq 1921-mi qaqqarsuarmi Mount Everestimi ilisimasassarsiortoqartillugu ilisimasassarsiortunit siumorneqarmata tumipiluunersuit tappavani ikerinnarmi 6,5 kilometerisut qaffasissusilimmiittut. Kingorna aamma 1953-imi tumit tassunga assingusinnaasut Mount Everestimi siumorneqaqqipput. Ukiorlu kingulleq decembarip qaammataani TV-qarfiit ilaannit takutinneqarpoq Nepalip qaqqarsuini assilineqarsimasut tumit 33 cm-risut angisussillit siumorneqarsimasuttaaq.

DNA atorlugu meqqut misissukkat aallaavissineqanngippata, ilisimatuut uumasup uumasunut sorlernut ilaanera paasiniarniarpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq