Edward Kennedy 77-inik ukioqarluni toquvoq
Amerikami naalakkersuinikkut ingerlatsinermi inuit sunniuteqarnerpaat ilaat toqukkut qimaguppoq. Demokraatit senatimut ilaasortaatitaat Edward Kennedy 77-inik ukioqarluni Massachucett-imi angerlarsimaffimmini unnuaq toquvoq.
Allattoq Elisa Isaksen
Ukioq manna siusinnerusukkut kræfti tinumasoq qaratsaminiittoq peersippaa.
Edward Kennedy, imaluunniit taaneqartartoq Ted, qatanngutigiit tusaamaneqarluartut Kennedykkut toqukkut qimaguttut kingullersaraat.
Taassuma angajoraa præsidenti toqutaasoq John F. Kennedy, taannalu taarserlugu 1962-imi Senatimut ilaasortanngorpoq, arfineq-aappassaanillu qinigaaqqereerluni toqussi tikillugu ilaasortaalluni.
Qatanngutaa alla Robert Kennedy, angajumi toqutaaneranit ukiut tallimat qaangiuttut toqutaavoq, tamannalu pilluni Demokraatit sinnerlugit 1968-imi præsidentimut qinigassanngortittussannguleraluarluni.