Edward Geisler Siumumut nuuppoq
- Atassutip qimassimanera pingaarnerpaanngilaq. Pingaarnerpaavorli, partiip inuiaqatigiinnut oqariartuutai qanoq ittuunersut, uanilu Siumup anguniagai, inuiaqatigiinnut kalaallinut tunngalluinnartunik oqariartuuteqartut, pingaarnerpasimapput, Edward Geisler oqarpoq.
Atassut-ip aallartinnermini siunertaraa, kalaallit Nunaata Danmarkimut ataannarnissaa, Edward Geisler-ili ukiut 30-it missaani Atassummut ilaasortaasoq, maanna isumaqarpoq, inuiaqatigiit ataqatigiissut, ilatsiinnartuunngitsut, eqeersimaartut imminnullu nappassinnaasutut isigisut Siumup siunnerfianniittut.
- Inuiaqatigiit nammineerusuttut eqqarsaatigissagaanni, uanni erseqqilluinnartoq unaavoq oqariartuut, nammineerluta nuna manna ingerlattariaqarparput, Edward Geisler oqarpoq.
- Isummertarnera allanngoriartorsimanngilaq, kisiannili siunnerfiit eqqartukkakka pissutsinut malinnaatinneqartut takussaapput, Siumup Ilulissani immikkoortoqarfiata siulittasortaava, Edward Geisler naggasiivoq.
Siumup siulittasuanik, Naalakkersuisut siulittasuannik Hans Enoksen-imik, imaluunniit Atassutip siulittasuanik, aalisarrnermik naalakkersuisumik Finn Karlsen-imik oqaaseqartitsiniaraluaratta iluatsinngilarput.