Ecuadorimi parnaarussivinni pingasuni eqqissiviilliortoqarmat parnaarussat 67-t toqutaasut

Ecuadorimi pinerlunniaqatigiit parnaarussivinni pingasuni eqqissiviilliortitsineranni toqutaasorpaaloqartoq, Ecuadorip naalakkersuisui ilisimatitsipput.
Ecuadorimi nunap immikkoortuini Guayasimi, Azuayimi Cotopaximilu parnaarussivinni eqqissiviilliortoqarpoq. Guayasimi eqqissiviilliorneq politiinit unitsinneqareersoq, Ecuadorimi naalakkersuisut nalunaarutigaat. Assi © : Marcos Pin Mendez/AFP/Ritzau Scanpix
Allattoq Ritzau
februaarip 24-at 2021 07:37
Nutserisoq Mads Lynge

Ecuadorimi parnaarussivinni pingasuni eqqissiviilliortoqarmat parnaarussat 67-t toqutaapput.

Ecuadorimi naalakkersuisut marlunngornermi taama ilisimatitsipput.

Pinerlunniaqatigiit parnaarussivinni eqqissiviilliortitsisuusut Ecuadorimi naalakkersuisut oqaatigaat.

Præsident Lenín Morenop Ecuadorimi parnaarussivinni eqqissiviilliornerit unitsinniarsarisimagaluarpai, parnaarussivinni sukannersumik aqutsisoqarnissaa ilaatigut naalakkiutigisimallugu, soorlu aamma pinerlunniaqatigiit akornanni aporaattarnerit pakkersimaarniarneqartarsimasut.

- Parnaarussat 67-t ikinnerunngitsut toqusimasut pinerluffiusimasunik misissuisartut oqaatigaat, Ecuadorimi politiit Twitterikkut allapput paasissutissanillu allanik tunniussaqaratik.

Ecuadorimi nunap immikkoortuini Guayasimi, Azuayimi Cotopaximilu parnaarussivinni eqqissiviilliortoqarpoq. Guayasimi eqqissiviilliorneq politiinit unitsinneqareersoq, Ecuadorimi naalakkersuisut nalunaarutigaat.

Ecuadorimi naalakkersuisut politiillu pissutsit aaqqiivigineqarnissaat sulissutigigaat, naalakkersuisut nalunaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq