Dynamit kilot arlallit eqqaavissuarmut qimaannakkat
Qaartartunik nassaartuuvoq Jim Petersen, qaartartullu taakku nassaarai eqqakkanik ikuallanneqarsinnaanngitsunik katersuivimmi. Qaartartunik nassaartoq, tupassimaqaluni ima oqaluttuarpoq.
- Aqqusinermit asfalternikumiit immaqa meterimik ataatsimik ungasissusilimmiittoq karseq isigilerpara, taassumalu karsip parnaartartua ammariarmat qimerluaalaaleriarakku tupaqaanga isigilerakku karsip iluaniittut qaartartuummata dynamitit. Qaartartut taakku ikeriaannaammata, assut eqqarsariaammerpunga. Takorlooraannimi meeqqat takullugit qaartartut ujaqqanik milluuleraat, tamanna annertuumik kinguneqarsinnaasoq kialluuniit takorloorsinnaavaa, Jim Petersen sapaatiummat misigisimasani, tupigeqalugu KNRimut taama oqarpoq.
Jim Petersenip eqqoriarpaa karseq taanna qaartartunik imalik 5-10 kg-lullu akorngannik oqimaassuseqassasoq.
- Soorunalimi qaartartut takugakkit erngerlunga, politiit attavigaakka. Taava politiit qatserisartullu takkupput, qaartartullu tigullugit. Taasuma kingorna tusagaqanngilanga, qanoq pisoqarsimaneranik. Pisoq taama annertutigimmat inerniliisoqartariaqarpoq, ilami taama akisussaassuseqanngitsigisumik asuli qaartartunik aqquserngup eqqaanut ilisiinartoqarsinnaanngilaq, Jim Petersen Narsami najugalik qaartartumillu nassaarsimasoq oqarpoq.
Qaqortumi Politeeqarfiup pisortaa Bent Ole Kleist, KNR-imut oqarpoq qaartartut taakku nassaarineqarsimasut pisoqaasut. Qaartartullu taakku kiap, suliffeqarfiulluuniit sorliup igitarisimaneraat suli paasineqarsimanngitsoq oqaatigalugu.
Suliassaq kommunip sanaartortitsinermut ingerlatitsivianut ingerlateqqinneqarsimasoq, Bent Ole Kleistimit oqaatigineqarpoq. Kommune Kujallermiilli paasitinneqarpugut, suliaq tusarneqarsimanngitsoq. Taamaammat naluneqarluni qaartartut sumut pineqarsimanersut.
