Duty Free ingerlanerluppoq
- Aningaasartuutikillisaasariaqarsimavugut sulisunillu ikilisaasariaqarsimalluta, Pilersuisumi ingerlatsinermi pisortaq, Finn Fabricius oqarpoq, taanna isumaqarpoq imigassanik aalakoornartulinnik tupanillu akileraarutitaqanngitsunik eqqussueqqusiunnaarneq Pilersuisumut, Namminersorlutik Oqartussanit pigineqartumut ajoqutaasoq.
Ukiormanna januaarip aallaqqaataaniit imigassat cigaretillu akitsuusigaanngitsut Nunatsinnut eqquteqqusaajunnaarput tamannalu Pilersuisup annaasaqaatigaa.
- Kangerlussuarmi Pilersuisumi isertitagut apparujussuarput, kaaviiaartitagut 50 procentip tungaanut annikillipput. Kangerlussuarmilu Pilersuisumut assut eqquinerluppoq, Pilersuisumi ingerlatsinermut pisortaq Finn Fabricius oqarpoq.
Tamatuma kingunerisaanik Pilersuisumi aningaasartuutikillisaasoqarpoq, akileraarutitaqanngitsunik pisiniarfimmi sulisoq ataaseq soraarsinneqarsimavoq, Kangerlussuarmilu Pilersuisumi sulisut pingasut soraarsinneqarsimallutik. Isertitat qanoq appariarsimatiginersut, ingerlatsinermi pisortap Finn Fabriciusip oqaatigiumanngilai.
- Eqqoqqissaartumik taanngikkaluarlugit, millionit koruunit arlallit isertitassaraluagut annaavagut, Finn Fabricius oqarpoq.
Pilersuisup Kalaallit Nunaanni imigassanik sodavandinik immiaaqqanillu tuniniaanermini kaaviiaartitai 14,6 millionit koruuninik ukiup siulianut sanilliullugu appariarsimasut 2010-mit 2011-mut ukiumoortumik KNIp nalunaarutaani erserpoq. Tassanili erseqqissumik takuneqarsinnaanngilaq, Kangerlussuarmi Pilersuisup tupanik, immiaaqqanik, viininik, imigassanillu kimittuunik tuniniaarnermini kaaviiaartitai qanoq appariartigisimanersut.
Tupamut imigassanullu aalakoornartulinnut akitsuutitigut isertitanut sunniutaasut, Akileraartarnermut aqutsisoqarfimmit suli naatsorsorneqarsimanngillat.
- Akileraartarnermut aqutsisoqarfiup allannguinerup sunniutai ukiup nutaap aallartinnerani nalilersorumaarpai, Lisbeth Møller Jensen, akileraartarnermut aqutsisoqarfimmi immikkoortortaqarfimmi pisortaq oqarpoq.
Kisitsisit eqqortut suli saqqummiunneqarsinnaanngikkaluartut, Kangerlussuarmi Pilersuisoq ajortumik ingerlasoq oqaatigineqarsinnaavoq. Maannalu Kangerlussuarmi Pilersuisoq sullissinissamut isumaqatigiissusiorfigineqaleruttorpoq.
- Namminersorlutik Oqartussat sullissinissamut isumaqatigiissusiorfigineqaleruttorput, isumaqatigiinniarnerit Aningaasaqarnermut ataatsimiititaliap aamma Pilersuisup akornanni suli ingerlapput. Isumaqatigiinniarnerillu iluatsissappata, taava Kangerlussuaq ukiup tullianiit sullissinissamut isumaqatigiissummi ilanngunneqassaaq, Pilersuisumi ingerlatsinermi pisortaq Finn Fabricius oqarpoq.
Aningaasaqarnermut Naalakkersuisuusimasup Palle Christiansenip akileraarutitaqanngitsunik tupanik, imigassanillu aalakoornartulinnut tuniniaajunnaarnermi nunatta karsianut iluanaaruteqarnissaq naatsorsuutigisimavaa, tassa pisiniarfinni tupat imigassallu aalakoornartullit tunisat amerlinerisigut.
