Druk Vinterbergilu Oscarimut innersuunneqartut
Danskit filimiliaanik kingullermik 2017-mi innersuusisoqarmalli, maanna nunat tamalaat akornanni filmitsialattut innersuussatut Oscarinnattoqarsinnaalerpoq.
Nunat tamalaat akornanni filimitsialannut Thomas Vinterbergip filmiliaa "Druk" Oscarinnannissaanut piukkunneqartutut ataasinngornermi nalunaarutigineqarpoq. Ilaatigut Thomas Vinterberg filmiliortutsialattut Oscarinnannissaanut piukkunneqarluni.
Filmiliortutsialattut piukkussani Vinterberg danskini siullersaavoq.
Pingaaruteqartorujussuuvoq, filimiliornerup aallartinnerata nalaani alianartoqarnikuummat, Vinterberg oqarpoq. Biilinimmi ajunaartoqarnerata kingunerisaanik 2019-mi panini annaavaa, Vinterbergilu filmiliani paniminut pigitippaa.
- Tamanna immikkuullarippoq, filmiliorneq immikkuullarilluinnartumik misiginarpoq. Filmiliornerummi nalaani pisorpassuaqarpoq.
- Qiimaneq, nalliuttorsiorneq aliasunnerlu ataatsikkut atorpagut. Taamaattumik sakkortunikooqaaq, taamaattumillu marlunnik nersornaaserneqarsinnaalerneq killitsissutigaara. Kusanartumik inerneqarpoq, Vinterberg oqarpoq.
Promillip affaanik amigaateqarluni inuusoq
Ilinniarnertuungorniarfimmi ilinniartitsisunut sisamaasunut, imigassaq atorlugu inuunerminnik nuannarinnileqqinnissaminnut misileraasunut, tunngasuulluni "Druk" isiginnaagassiaavoq pissanganartoq.
Inuk promillip affaanik amigaateqarluni inuusimaneranut isumaliutersuutimut, ilinniartitsisut misileraanerannut tunngavoq. Taamaakkaluartoq imernerulernermi ilutigisaanik inuunertik aqussinnaajunnaaraluttuinnarpaat.
Oscarinnanniunnermi ileqqut malillugit februaarimi ingerlanneqassaaq, coronamilli ajornartoornerup malitsigisaanik Oscarimik aaqqissuisartuniit aprilimut kinguartinneqarpoq. Tamanna aamma Oscarinnattussanik piukkussassarsiornissaq kinguartinneqarluni.
Coronamik nappaalanersuup kingunerisaanik Danmarki assigalugu nunarsuarmi filmertarfiit qaammaterpaaluit matoqqatinneqarput. Taamaattumillu filmertarfinni takutinneqarnatik isiginnaarutit soorlu Netflix Amazonilu aqqutigalugit filmerpaaluit saqqummiunneqarput.
Tuluit Nunaanni filminut nersornaasiinerit annersaani Baftamiit "Druk" apriilip 11-iani nersornaatisiassanut immikkoortunut sisamanut piukkunneqarpoq.
Tassani tuluttut oqaaseqanngitsunik filmitsialattut, filmiliortutsialattut, najoqqutassiatsialattut kingullertullu angutinik filmiliortutsialattut innersuuneqarpoq.
