Dronningip inuuissiornera nalliussilluarneqarpoq

Pisarneq malillugu Nuutoqqami qamutilittartoqarpoq. Ukioq manna qamutilittartoqarmat nakkutilliissut Ejnar Mikkelsen akisisuuvoq.

Borgmester Asii Chemnitz Narup najuuttunut oqalugiarpoq, upernaarpaluttunillu Nuuk Byorkester anori nillikujukkaluartoq tusarnaartitsipput.

Naggasiullugu borgmester Asii Chemnitz Narup najuuttut peqatigalugit inuusissiortoq erinarsorfigaat, Kommuneqarfik Sermersooq nittartakkamini www.sermersooq.gl-imi taama allappoq. Tassani aamma ippassaq inuuissiortoorluni Nuutoqqami aaqqissuussinermit assilisat takuneqarsinnaapput.

Borgmester Asii Chemnitz Narupip Dronningip apriilip 16-iani 2013-imi inuuissiorneranut atatitillugu oqalugiaataa tamakkerlugu ataani atuarsinnaavat:

Asasakka Nuummi innuttaasut – Nuutoqqamut uummammik pisumik tikilluaritsi.

Pisarneq malillugu ullumikkut Ataqqinartorsuup Dronning Margrethe II-ta inuuiani maani katersuuppugut, upernaarpalaalerluni, ullut qaammariartorfiini kiatsikkiartorfiinilu.

Ukiup affaa qaangiuppoq Dronningi Nuummi nuanneqisumik tikeraartorigatsigu. Issittumi Sakkutooqarfik Nuummi taamanikkut atoqqaartinneqarpoq.

Dronning Margrethep kunngikkormiullu sinnerisa tamarmik kissalaartumik, nuannersumik ataqqinnittumillu kalaallinik kulturitsinnillu naapitsinerat misigeqqipparput.

Nuannaarneq uummatinninnerlu illugiilluta pigaarput. Dronning Margrethep ataqqinninnera utertitsiffigerusupparput, aammalu uatsinnik Namminersornerunitsinnillu ataqqinninnera takutikkusullugu:

Danmarkimi Københavni Kunngip Københavnianik taaneqaraangat tulluusimaarluta Nuuk Dronningimut pigitikkusupparput.

Kommuneqarfik Sermersuumi innuttaasut tamaasa sinnerlugit Dronningi uummammit pisumik inuuiani pilluaqquarput.

Ataqqinartorsuaq Dronning Margrethe pingasoriarlugu huraarutigisigu:

Dronningi inuummersorli … Hurra, hurra, hurra, hurra, hurra, hurra, hurra, hurra, hurra.