Dronningimut tunissutip akia: 100.000 koruunit
Nuannanneq tunissuterpassuarnik malitseqartoq sapaatip akunnerata naanerani nalliussineqarpoq, Dronningip Naalagaaffimmi siuttuunera ukiunik 40-nngortorsiorneqarmat. TV-kkut isiginnaartut tusintilikkaat malinnaaqataapput.
Pingaartorsioqataasunut ilaapput Naalakkersuisut siulittaasuat Kuupik Kleist aamma Inatsisartut siulittaasuat Josef Motzfeldt aammalu guldinik pinnersaasiortoq Nicolai Appel ataqqinnartorsuup Dronning Margrethep Kalaallit Nunaata pisortatigoortumik tunissutisssaanik apuussisut.
Kalaallit Nunaata ataqqinnartorsuarmut tunissutaa tassaavoq naasut qilertat guultimik ujaqqanillu pinnersaasianit sanaasaajusut, guulti ujaqqallu Kalaallit Nunaannit pisut.
- Immikkuullarissuunissaa Nunatsinneersuunissaalu eqqarsaatigisimavarput. Aamma tunissut Dronningimut ajukkunnartuussanngitsoq isumaqarsimavugut, Kuupik Kleist tunissut pillugu oqarpoq.
Naasut qilertat taakkua Dronningemut tuniussutit siullersaaraat.
Martsip qaammataani kukkilisak guldinik rubinimik tuttupitsimillu pinnersaatilik naammassineqassaaq. Kukkilisak taanna ilusilersorneqarpat Dronning Margrethe suleqataassaaq.
Naalakkersuisut siulittaasoqarfiani allaffimmi pisortaq Peter Schultz radioaviisimut oqarpoq, naasut qilertat guultinit sanaajusut suliarineqarnerat 100.000 koruuninik naleqartut. Taassuma saniatigut kukkilisak upernaamut naammassillugu suliarineqarpat suli akisunerujumaartoq.
- Aningaasartuutit suliffeqarfiit tallimat, Naalakkersuisut Inatsisartullu avippaat. Suliniut manna suliffeqarfiit namminneq aallartitaraat aalangersimavugullu tapersersorniarlugu, Kuupik Kleist oqarpoq.
