Dronningikkut Nanortalimmut tikeraarput
Atuarfiup pisortaata, Paul Raahaugep, atuarfiup oqaluttuassartaa maannalu pilersaarutit oqaluttuarai. Dronningikkut malittaallu apeqqarissaaqaat. Ataqqinartorsuarli aamma quiasaalaarnissamut piffissaqarpoq, soorlu imatut:
- Atuartut tamarmik sapaatip akunneranut akunnerni marlunni eqaarsaartarput. tassalu 60 minutsit marloriarlugit. Meeqqallu aalasarnissaat uagutsinnut pingaartupilussuuvoq.
Taava Dronningi oqarpoq:
- Aamma minnerpaamik ataaseq soorlu qasujaallivissimasoq. Biilernitsinni aqqutaa tamaat ingiallorpaatigut.
Dronningip taama oqarnermini pivai, dronningikkut illoqarfik kaajallallugu biilinik ingerlaarmata, arajutsisaallutik malinnaasorpassuit.
Atuarfiup ittuata dronningi naggataatigut qinnuigaa, kunngissakkut kuisittoorneranni tunissutissani taakkununnga apuuteqqullugu, namminermi periarfissaqarsimannginnami. Tassa nannumik marluliaanillu asseq, Paul Raahaugep nammineq assilisaa. Aanaallu taamaaliornissani nuannaarutigeqaa.
- Aa kusanaq! Takusat nuanneq, Dronning Margrethe alutorsaqaluni oqarpoq. Atuarfiullu ittua isumaqatigaa, marlulissat inaannut naleqqutissaqisoq, apuutissallugillu neriorsuilluni. Peqitinnginnissaat sulisuminut aamma isumageqquaa.
Aamma Inuusuttut klubbiat alakkarneqarpoq, tassanilu pisortaasoq, Else Margrethe Eugenius, pissangasimangaarami sininngitsoorsimavoq:
- Pissanganermik sininngitsoorpunga, Else Margrethe Eugenius oqarpoq.
Dronningikkut aamma silami saqqummersitsivik takuniarpaat, Hans Hedtoftimullu eqqaassutissamut ningalimmik aamma nassarlutik. Tamatuma kingorna meeqqat ornittagaat, Pilutaq, pulaarneqarpoq. Naak Nanortalik ulloq tamaat siallerluni anorleraluartoq, Ananiaaqqap kalaattoortartui meeqqat kaavikuluunik takutitsipput.
Dronningikkut Nanortalimmi tikeraarnerat timersortarfimmi kaffisuunnermik naggaserneqarpoq, ataqqinartorsuup tassani Nanortalimmiut marluk nersornaammik saqqarmiulerpai.
Dronning Margrethe, Prins Henrik malittaallu nunaqarfimmut Nanortallip kangiani kangerlummi Tasermiuni Tasiusamut ullaap tungaa tikeraarput, ullup qeqqaniillu Tasermiuni ilummukaqqipput, savaatilikkut David Paulsenikkut alakkarlugit.
