Kunngikkormiut tikeraarnerat Dronningi: Meeraallungali Kalaallit Nunaannut asannilerpunga
Maanna dronningiusoq prinsesseugallarami aqqaneq marluinnarnik ukiulik Kalaallit Nunaat pillugu iluamik aatsaat tusaqqaarpoq. Kunngi Frederik Dronning Ingridilu 1952-imi aasaanerani angalaaqqaarpiarput. Angerlaramillu tunissutinik eqqaamasalikkersaarutinillu ulikkaarlutik.
- Misigisaat nuannersimaqaat, oqaluttuaraallu, dronning Margrethe Dannebrogimi apersorneqarnermini oqarpoq.
Angajoqqaavi tunissutinik nassarlutik uterput, ilaatigut prinsessenut pingasunut kalaallisuut. Aammalu assit filmiliallu takusimallugit.
- Pingasuulluta soqutigisorujussuuvavut. Immaqa uanga angajulliugama soqutigineruakka, dronngingi oqaluttuarpoq.
- Namminerlu ullut arlaanni Kalaallit Nunaaliarnissani taamanili eqqarsaatigilerpaa. Meeraanera tamaat nuna taassuma tikinnissaa sinnattoraara.
Tikeraaqqaarneq
1960-imilu sinnattua piviusunngorpoq.
- Angajoqqaakka ilagalugit tikeraarpunga, misigisakkalu alutoreqaakka, oqaluttuarpoq.
Taamiilli naluneqanngitsumik arlaleriarluni tikeraarnikuuvoq, sulili tikinnerit tamaasa misigisaq nuannertarnerarpaa. Dronningillu nunamut maannga asanninnera uianut aamma sunniuppoq, uiata taamani Angmassalik 1970-imi tikeraaqqaarpaa.
- Ingerlaannaq nuannarilerpara, prins Henrik oqaluttuarpoq.
- Tamassuma kingorna kitaanukarnerusarpunga, tamatigullu nuannertaqaaq, erseqqissaavoq kalaallillu nerisassaataat nersualaarlugit. Namminermi nuliatalu mattaat mamareqaat.
Uummammit tikilluaqqusineq
Uummammit pisumit tikilluaqqusisarneq Kalaallit Nunaannut aasaanerani angalaartarnerannik immikkuullaritsitsisarpoq.
- Inussiarnerlutik nuannaarlutillu tikilluaqqusisarneri nuannaajallannartaqaaq. Sumulluunniit tikikkaangatta uummammit pisumit tikilluaqquneqartarpugut, taamaammat iluarusuttarpugut, dronningi oqaluttuarpoq.
- Pilluaammertarpugut, prins Henrik ilaliivoq.
Kunngikkormiut 75-inik 81-inillu ukioqalersimagaluarlutik, tikeraaqqissallutik oqarput.
- Ilaana, dronning Margrethe Qanoruup aallartitaanut oqarpoq.
Kunngikkormiunik apersuineq unnugu Qanoruumi takusinnaavat.