Dronningi kalaallillu aqqi

Kisianni tupaallappianngillat - atimmi Nunatsinni qanoq pingaartinneqartigisut nalunngilaat.

- Marlulissat atii taama oqaluuserineqartigimmata attortissutigeqaara, ataqqinartorsuaq Dronninngi tusagassiortunik Katuami ippassaq katersortitsinermi oqarpoq. Nangipporlu:

- Tupaatigivallaanngilara, atimmi Kalaallit nunanni qanoq isumaqartinneqartigisut nalunnginnakku. Isumaqartinneqaqaat. Inuit ateeriinnertik, inuuissioqatigiittarnitik peqaariinnertilluunniit nalunngilluinnartarpaat. Kalaallit Nunaanni ataqatigiissuteqartarput. Ilaasa oqarfigisarpaannga: "Uanga aamma 1940-mi inunngorpunga" imaluunniit "Uanga aamma apriilip 16-ani inuissiortarpunga" imaluunniit "Uanga anaanaga aamma Margrethemik ateqarpoq", Dronningi oqaluttuarpoq.

Kunngikkormiut meeraanersaat, marlulissat prins Vincent aamma prinsesse Josephine, naluneqanngitsutut aamma Minimmik Ivalo-millu ateqarput, taamalu ateqarnerat kunngikkormiut Kalaallit Nunaannut qanittumik attaveqarnerannik taamaallaat pissuteqanngilaq.

- Kunngissakkut meeqqatik marluk kalaallisut atseramikkit, takutinniaannanngilaat, Kalaallit Nunaat imminnut isumaqarmat, aammali Kalaallit nunaanni isumaqassaaq. Oqartoqartassaarmi, marlulissat aappaa uanga ateeraara. Aamma Niaqornani arnaq utoqqaq Josephinemut tunissuteqarpoq, taanna aamma Matildemik ateqarmat, utoqqarlu taanna aamma taama ateqarluni. Taamaaliorneralu kusanarpoq, Dronning Margrethe oqarpoq.

Qanittukkut aamma saqqummiunneqarpoq, kunngikkormiut kingulliit marluk saniatigut aamma allamik kunngikkormiut Nunatsinnut tunngassuteqarnerannut ersiutaaasumik taaguteqartoqartoq.

Kunngissakkut ernerat angajulleq, prins Christian, Danmarkip kunngerilerumaagaa, ataataminit Nanormik taagorneqarpoq.