Dronningip kalaallisoortup assilinera 80-iliineranut atatillugu frimærkiliarineqartoq
TELE-POST dronning Margrethep 80-iliineranut atatillugu frimærkemik saqqummersitsivoq.
TELE-POST tusagassiuutinut nalunaarummini taama allappoq.
Ataqqinartorsuup kalaallisoortup qalipallugu assilinera nunatsinni eqqumiitsuliortumit Aka Høeghimit qalipanneqarsimavoq. Aka Høeghip dronningimik ukiorpassuit ingerlanerini naapitsiisarnini qalipakkaminut isumassarsiorfigisisimavaa.
Droninngi asimi qorsooqqissumi naasorasattumilu kalaallisoortup assilinera frimærkiliarineqarpoq, qaqqallu ungataani takussaapput.
AAMMA ATUARUK Qamutilittarneq erinarsoqatigiinnerlu: Dronningi facebookikkut nalliussineqassasoq
Qaqqat qaavi dronningip niaquata tunuata nalaaniittut dronningip niaqorutaatut assimi ilusilerneqarsimapputtaaq, Aka Høeghip eqqarsaatigilluarlugit ivertissimasai. Tele-Postimi sullitanut allakkerinermullu pisortaq Per Svendsen taama oqarpoq:
- Ukiut ingerlanerini ileqquulersimavoq kusanartoq, kunngikkormiuni angisuunik ullorsiortoqartillugu kalaallit frimærkiannik saqqummersitsinikkut malunnartitsisoqartarluni. Ataqqinartorsuullu dronningip 80-inik ukioqalerluni inuuissiornera ullorsiorfiuvoq angisooq, Per Svendsen oqarpoq.
Frimærki dronningip ullumi apriilip ulluisa 16-ianni inuuissiornera aallarnerfigalugu Tele-Postip allaffeqarfiini tamani pisiarineqarsinnaalerpoq.