Dronning Margrethe tunuarniuteqarnavianngilaq
Atuakkiortup tusagassiortullu John Lindskogip atuakkiamini "Royale Rejser"-imi allaaserigaluarpaa dronning Margrethe aappaagu apriilip 16-iani 70-iliiguni dronningitut tunuarniuteqassasoq, uinilu prins Henrik Frankrigimut nooqatigerusukkaa. Kunngikkormiulli avammut tusagassiisartuata Lene Ballebyp, tamanna ilumuunnginnerarpaa.
Allattoq Mads Lynge
oktobarip 20-at 2009 13:20
- Prins Henriup Danmarkiminngaanniit Frankrigimut nuunnissani pilersaarutiginngilaa. Viinniliassanik naatitsivimminukarnerusalernissani 70-iliinerminut atatillugu nammineq nalunaarutigaa, Chateau de Caïximiinnerusalernissani taamanikkulli siunniukkamiuk, tamannalu massakkut piviusunngulerpoq, Lene Balleby oqarpoq.
Tusagassiuutitigut saqqummersitat ataasiakkaat Kunngikkormiut oqaaseqaateqarfigineq ajoraluarpaat, matumanili avammut oqaaseqarnissaq pingaaruteqartutut nalilerneqarsimavoq, dronningip naalagaaffiup qullersaatut tunuarniuteqarusunnginnera oqariartuutigineqarluni.
