Dronning Margrethe: Prins Joachim prinsesse Marielu akunnitsinni ajornartorsiutit annernarput

Ataqqinartorsuaq Dronning Margrethe Danmarkimi nalunaaqutaq arfinermut maani nalunaaqutaq marlunut ukiortaamut oqalugiarpoq. 

Dronning Margrethep ukiortaamut oqalugiarnermini nukarlequmminit Prins Joachimimit ernuttami sisamat prinsitut prinsessetullu ukiortaamiit taaguuteqarunnaarnissaannik ukiaq aalajangersimanini ilaqutariinni initoorujussuusimanerarpaa.

Tamatuma kingunerisaanik Prins Joachimip nuliatalu prinsesse Mariep kunngikkormiut sinnerinut attaveqarnerat sammineqartorujussuusimavoq.

- Ilaquttakka tamaasa asasorujussuuakka. Ilaqutariinni tamani ajornartorsiortoqalersarpoq isumaqatigiinngittoqartarlunilu, uanga ilaquttanni aamma taamaappoq, Danmarkilu tamarmi uagutsinni pisunut malinnaasimavoq, Dronning Margrethe oqarpoq.

- Prins Joachimip prinsesse Mariellu akunnitsinni ajornartorsiuteqalernerput uannut annernarpoq, Dronning Margrethe nangilluni oqarpoq. 

Maannali ilaqutariit eqqarsarfeqarnissamut eqqissisimaarnissamullu aamma piffissaqarnerulersimasut oqaatigaa.

- Qularinngilara ilaqutariilluta ukioq nutaaq isumalluarfigalugu, paaseqatigiilluta sapiissuseqarlutalu iserfigiumaaripput.

Kalaallit Nunaannut Savalimmiunullu Inuulluaqqusivoq

Dronning Margrethe taama oqarpoq. Oqalugiarnerminilu Nunarput Savalimmiullu pisarnertut ilannguppai.

- Nunarsuarmi nalorninartorsiortoqarnera Atlantikup avannaani Issittumilu aamma malugineqarpoq. Savalimmiuni Kalaallillu Nunaanni Danmarkimilu pisut pissangalluta malinnaaffigaavut. Demokratii tunngavigalugu ingerlatsinermi pingaartitat ataqatigiinnerpullu nukittupput. Aatsaallu taama pingaaruteqartigilerlutik. Savalimmiormiut kalaallillu qamannga pisumik ukiortaami pilluaqquakka.

Dronning Margrethe taama oqarpoq.

Ukrainep ukioq manna februaarimiit sorsuffigineqalernera tamatumalu kingunerisaanik nunarsuarmi akit qaffakkaluttuinnarnerat Dronning Margrethep 51-issaannik ukiortaamut oqalugiarnerani imartusutut oqaatigisariaqarput.