Dronning Margrethe ilisinermi kunngip Charlesip saaniittoq
Tuluit dronningiata, Elizabethip Tuluit Nunaanni illoqarfiit pingaarnersaanni Londonimi ilisaanera danskit nalunaaqutaat naapertorlugu ataasinngornermi aallartippoq.
Ilisineq oqaluffimmi Westminster Abbeyimi pivoq.
Dronning Margrethe kunngissarlu Frederik qaaqqusanut ilaapput. Taakku illerfiup aamma kunngip Charlesip dronningillu Camillap qanittuaniipput.
Dronning Elizabethip ilerra inatsisartut illorsuanit Westminster Hallimit Westminster Abbeymut danskit nalunaaqutaat naapertorlugu ataasinngornermi nalunaaqutaq 11.45 ingerlanneqarpoq.
Illerfik qamutillip allequtaanik – qamutaasatoqqanik – tuluit sakkutuuinit imarsiortunit ingerlanneqarpoq. Qamutaasatoqaq ukiunik 123-nik pisoqaassuseqarpoq taannalu kunngip George VI-p 1952-imi ilisaanerani aamma atornerpoq.
Qamutiliup tunuani dronningip meerai kunngi Charles, prinsesse Anne, prins Andrew aamma prins Edward malinnaapput. Taakkulu tunuanni kunngikkormiut ilaqutaat allat – ilaatigut ernutaasut kunngissaq William aamma prins Harry malinnaapput.
Ilisinermi akunnermik ataatsimik sivisussuseqartumi arlalinnik tussiartoqarlunilu oqalugiartoqarpoq. Tuluit ministeriunerat Liz Truss oqalugiartut siulliit ilagaat.
Ilisinermi kunngikkormiunit nunarsuatsinnilu politikerinik ilisimaneqarluartunik peqataasoqarpoq.
USA-p præsidentia Joe Biden, Frankrigip præsidentia Emmanuel Macron aamma Canadap ministeriunera Justin Trudeau ilisinermi ilaatigut peqataapput.
Ilisineq nalunaaqutaq 13.00 naammassineqarpoq.
Illerfik tamatuma kingorna Westminster Abbeymit Wellington Archimut Hyde Park Cornerip eqqaanut sakkutuunit politiinillu ungalusimaneqartukkut ingerlanneqarpoq. Minutsikkaartumillu Hyde Parkimit qamutilittartoqarlunilu nalunaaqutarsuarmit Big Benimit sianeq kasuppaluttarpoq.
Nalunaaqutaq 17.00 ilaqutaanut qaninnerusunut naalagiartitsisoqarpoq.
Ilisinerup naammassiartornerani dronningip niaqorutaa tigummialu illerfimmit peerneqarput. Tamatuma kingorna illerfik kunngikkormiut illerfiisa inaannut, The Royal Vaultimut dronningip uiata prins Philipip illerfiata aamma inissisimaffisaanut ilineqarpoq.
Ilisineq naggaserlugu dronningip nammineq kissaatigisaatut kunngikkormiut sækkepibertartuinit God Save the Kingip erinaa atorneqarpoq.
/ritzau/
