Dronning Margrethe dronning Elizabethip ilisaanerani peqataassasoq

Dronning Margrethe, kunngissaq Frederik nulialu Mary, dronning Elizabethip Londonimi ilisaanissaanut peqataassapput.

Kunngikkormiut nittartakkaminni marlunngornermi taama ilisimatitsipput.

Dronning Elizabeth ukiuni 70-ini dronningiuvoq - 1952-imili. Taamalilluni Tuluit Nunaata oqaluttuarisaanerani dronningit kunngillu akornanni sivisunerpaamik atavoq.

Dronning 96-inik ukioqarluni sisamanngormat unnukkut toqusoq nunanit tamalaanit eqqaaniarneqarpoq.

Danmarkip dronningia nunani tamalaani kunngikkormiut akornanni maanna sivisunerpaamik atavoq, dronningitummi ukioq manna januaarip ulluisa 14-ianni ukiunik 50-inngortorsiorpoq.

AAMMA ATUARUK Dronning Margrethe ukiuni 50-inngortorsiornini pillugu: Dronninnginngortussaananga inunngorpunga

Dronning Elizabeth Londonimi oqaluffissaarsuarmit Westminster Abbeymit ilisaassaaq.

Dronningip illerfia tamanna sioqqullugu Skotlandimi Edinburghiliaanneqaqqaassaaq.

Illerfiup Tuluit kunngeqarfianni angallanneqarnermini kunnginngortumit Charlesimit, nulianillu, dronningitut inissisimasumit Camillamit ingiallorneqarpoq.

Naalagaaffiup tamarmiusup ilisinera, oqaluffimmit Tuluit Nunaanni kunngit dronningillu kunngisut dronningisullu niaqoruserneqartarfigisimasaannit pissaaq.

Nunani tamalaani naalagaaffiit qullersaat dronningip naggammik qaniorneqarnissaanut peqataanissamut qaaqquneqarsimapput. USA-p præsidentia Joe Biden taakkununnga ilaavoq.

/ritzau/