Dronning Ingridip Peqqissaavissua facebookimi quppernertaartussanngortoq

Peqqissaavissuaq innuttaasunut pitsaanerusumik attaveqartalerniarpoq.
Assi © : Jonas Løvschall-Wedel
Allattoq Bikki P. Kleist
januaarip 18-at 2018 08:14

Dronning Ingridip Peqqissaavissua facebookimi quppernertaartussanngorpoq.

Quppernermi ilaatigut akiuussutissamik kapitinnissamut oqarasuaatillu attavii pillugit paasissutissat atuarneqarsinnaasassapput. Likerisoqarsinnaassallutillu.

Innuttaasunut pitsaanerusumik attaveqarnissaq matumani siunertaavoq.

Politiit facebookerisaat 10.000-init malinnaaffigineqartartoq Dronning Ingridip Peqqissaavissuata isumassarsiorfigisarsimavaa.

Peqqissaaviulli quppernissaani inuit ilanngussillutik allataqarsinnaasassanngillat namminerlu nalunaarutinik nassiussisoqarsinnaassanani, ilanngussaareersunilli allassinnaasassallutik.

Nakorsamut inniminniisoqarsinnaananilu nakorsaatinik tassuuna piniartoqarsinnaanngilaq.

Inniminniinerit oqarasuaatikkut, e-doktorikkut ornigunnermiluunniit aatsaat pisinnaapput.

Dronning Ingridip Peqqissaavissuata facebookimi quppernertaassaa januaarip 20-ani atulissaaq.

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk