DR-ip sulisui isornartorsiuingaatsiarput

Danmarks Radiop ullaakkut nutaarsiassaqartitsiviata, TV-avisip, ullaakkut aallakaatitsisarunnaarluni meeqqanut ukiortaamiit aallakaatitsisalernissaa, DR-ip sulisuinit isornartorsiorneqangaatsiarpoq, taama allaaserisaqarpoq Danmarks Radiop sulisuisa tusaataat, Dråben. Aalajangerneq nakkaannarnertut pilersaarusiorluarnerunngitsutullu sulisunit nalilerneqarpoq, isumaqarpullu periarfissaq unammillertiminnut TV-2-mut tunniunneqartoq.

TV-aviisi ullaakkut aallakaatinneqartarunnaarpat, Danmark-imi isiginnaartartut affaat, nutaarsiassanik TV-2-mit aallakaatinneqartunit, unnukkut nalunaaqutaq aqqanermiit aqaguani nalunaaqutaq ulloqeqqata tungaanut isiginnaarsinnaalissapput.

DR-ip nutaarsiassaqartitsiviani pisortanngorlaaq,

Lars Grarup isornartorsiuisut akillugit oqarpoq, Danmarks Radiop Radiukkut, nutaarsiassanik aallakaatittagaatigut tusarnaartartut 1 milliuunit sinneqartut ullaap tungaani tusarnaartorisarlugit.

TV-aviisip ullaakkut aallakaatittarunnaarnissaanut Danmarks Radiop ulluinnarni aqutsisuisa tunngavilersuutigaat, TV-aviisi unnukkut aallakaatinneqartartussaq taamalilluni aallunneqarnerulissasoq.