DR-ip piviusulersaarusiaa"Flugten fra Grønland" Politiinut suliassanngortinneqarpoq

- Misigisimavugut inunnik isumaginninnermik sulisut suliarisartagaat pillugit immiussisoqarmat salloqittarneqarsimalluta, tassami inunnik isumaginnittutut pingaartuuneq malunnaarsaarluni ingerlanneqartarpoq, sulinermilu inuit misigissusaat attorneqartarput, angajoqqaat inunnillu isumaginnittutut pingaartuusut akornanni nuanninngitsunillu misigisaqarfiusarpoq. Taamaammat suleriaaseq imaannaangitsuuvoq.

Taamaattumik isumaqarpugut mianersoqqissaartoqartariaqartoq, pissutsinik taamaattunik immiussisoqassappat avammullu takutsitsisoqarluni. Vibeke Møller Jensen nassuiaavoq.

- Aamma niviarsiaraq iluatsigut atisaqanngitsoq takutinneqarpoq, tamannalu ileqqorisaaarnerunngilluinnarpoq, tassami illoqarfimmut taamatut saqqummiunneqarnera ajornartorsiutaalluinnarpoq, inuimmi tamarmik nalunngilaat meeqqanik kinguaassiuutitigut atornerluisarneq pillugu ajornartorsiuteqartugut, soorlu aamma nunani allani taamaattoqartoq. Meeqqanillu kinguaasiuutitigut atornerluisartut assinik taamaattunik ujaarlertartut nalunngilluinnarparput, tamannallu piviusulersaarummi saqqummiisoqarsinnaanngilluinnaraluarpoq. Vibeke Møller Jensen oqarpoq.

Taanna aamma nassuiaavoq majip qaammataani DR-imi tusagassiortumit saaffigineqarsimagaluarlutik, inunnik isumaginnittutut pingaartup sulinerani malinnaavigineqarsinnaanerlutik, tamannalu akuersaarsimanngilaat.

Piviusulersaarusiornermilu inunnik isumaginnittutut pingaartup saqqummernera, politiit suleriaasianik malinnaanermiit immiussinermeersuuvoq.

Nuummi Politimester Morten Nielsenip, Nuup Kommuneata saaffiginnissimanera uppernarsarsinnaanerarpaa, suliamulli tunngasunik oqaaseqarumanngilaq.