Soraarsitsiortornissamik ilimasaarutit pissutigalugit DR-imi sulisut suliatik unitsippaat, sulisut 300-t missaat soraarsitaassasut ilimasaarutigineqareerpoq.
TV-avisi Radioavisilu suliumajunnaarnermit aamma eqqorneqarput.
DR-Bymi aviisiliortut sulinerminnut atatillugu ullaaq ataatsimiipput, taasineqareermallu aalajangerput sulinertik unitsinniarlugu.
DR-p illutassaata Ørestadimiittup sananeqarnerani aningaasartuutissat qaangerujussuarneqarmata, soraarsitsinissaq pisariaqalersimavoq, Danmarks Radiop illutaava 4,7 milliardi koruuninik akeqartussanngorpoq, tassa 1,7 milliardi koruuninik akisunerusussanngorluni.