DR-imi sipaarniarneq akerliuffigalugu suliumajunnaarput
Danmarkip Radioani sulisut arlalissuit sulinertik ullumimiit aqagu ullaakkut tungaanut unitsippaat, suleqatitik 104-t, sipaarniartoqarnissaa pissutigalugu, soraarsitaanngikkunik namminneq soraarniuteqartut akerliullutik.
Naak suliaminnik unitsitsisut Danmarkip Radioani pisortaanerup, Kenneth Plummerip, aappaatigut akuerisinnaanngikkaluarlugit paasisinnaanerarpai.
- Isumaqatigiissummut akerliusumik suliumajunnaartarnerit akuersaarsimmaaneq ajorpakka. Kisianni Danmarkip Radioani sulisut suleqatiminnut pikkorissunut taama amerlatigisunut inuulluaqqusinissartik ajuusaarutigimmassuk paasisinnaavakka, Kenneth Plummer oqarpoq.
KNR TV-kkut unnugu aallakaatitassat aamma eqqorneqarput. Nutaarsiassat Danmarkip Radioanit aallakaatinneqartartut TV2 -p nutaarsiassaataanit taarserneqassapput, aamma Aftenshowet aallakaatinneqarsinnaajunnaarluni.