DR amerlanerusunik aningaasaliiffigineqassava
Danmarks Radio amerlanerusunik aningaasaliiffigineqassava, imaluunniit naami?
Apeqqut taanna, tusagassiuteqarneq pillugu Folketingimi oqaaseqartartut piorsarsimassutsimut Danmarkimi ministeri, Brian Mikkelsen, ullumi ataatsimeeqatigilerunikku, paasiniassavaat.
Tusagassiuteqarneq pillugu Socialdemokratit oqaaseqartartuat, Mogens Jensen, oqarpoq, DR-ip ikiorserneqarnissaa Naalakkersuisut Dansk Folkepartillu piumassuseqarfigineraat tassani apeqqutaalluinnartoq, sipaarniarnermut pilersaarut ingasappallaarunnaarniassammat. - Piumassuseqarpata, aningaasaliisarneq qanoq isikkoqarnersoq misissussallugu tullinnguutissaaq, Mogens Jensen oqarpoq.
Taama sipaarniartoqartillugu, timersornermillu nutaarsiassat tassani eqqorneqarnerpaapput – kiffartuussinissamut isumaqatigiissut DR-ip eqqortissinnaaneraa Dansk Folkepartip ilimaginngilaa. Nunanut allanut unamminerit OL-illu kanalini akileeqqarluni isiginnaarneqarsinnaasuniinnaq aallakaatinneqartalernissaat Dansk Folkepartip akuersaarnartinngilaa. Taamaakkaluartoq DR amerlanerusunik aningaasaliiffigeqqunngilaat, siulittaasup tullia, Peter Skårup, oqareerpoq.
DR-ip amerlanerusunik aningaasaliiffigineqarnissaa Socialdemokratit, Radikalit SF-llu kissaatigaat, tusagassiutilli naalagaaffimmit aqunneqalernissaat illuatungiliuttut kissaatigigaat Konservativit isumaqarput.
