Dorissip AWG-miinnera aningaasaqarnermut inatsisissamut kalluaavoq

Kultureqarnermut naalakkersuisup Doris Jakobsenip Issittumi nunallit unammiuaaqatigiinneranni peqataanera pissutaalluni, aningaasaqarnermut inatsisissap Inatsisartuni aappaassaaneerlugu oqaluuserineqarnissaralua kinguartinneqarpoq. Tamannalu ataatsimiititaliamit sakkortuumik qisuariaatigineqarpoq.

- Aningaasaqarnermut ataatsimiititaliaminngaanniit qinnuteqaatigisimavarput siulittaasoqarfimmut aningaasanik inatsisissap aappassaaneerneqarnissaa kinguartinneqassasoq peqqutigalugu Ilinniartitaanermut kultureqarnermullu naalakkersuisup isumasioqatiginissaanut periarfissaqarsimannginnatta naalakkersuisup angalanera peqqutigalugu, taama oqarpoq, aningaasaqarnermut ataatsimiititaliami siulittaasoq Ellen Christoffersen.

Angalanerlu pineqartoq tassaavoq Issittumi nunallit unammiuaaqatigiinnerannut atatillugu Kultureqarnermut naalakkersuisup Doris Jakobsenip peqataanera.

Aningaasaqarnermut inatsisissaq tallimanngorpat marsip 17-iani inatsisartuni ataatsimiissutigineqartussaagaluarpoq ataasinngornermullu marsip 20-ianut kinguartinneqarpoq.

- Tassa allagaqaateqarsimavugut siulittaasoqarfimmut, uparuartuutigalutigulu taamatut naalakkersuisup sapinngisamik siunissami pinaveersimaartittassagai. Pingaartumik inatsisartuni aningaasanut inatsisissap suliarineqarnerata nalaani angalanissat sapinngisamik pilersaarusiorluarneqartassasut inatsisartut suliaanut kinguarsaataanngitsumik, Ellen Christoffersen oqarpoq.

Kultureqarnermulli naalakkersuisoq Doris Jakobsen oqarpoq, angalanini inatsisartunit tamanit naalakkersuisuniillu akuerineqarsimasoq, taamatuttaaq Issittumi nunallit unammiuaaqatigiinnerini ileqquusartoq timersornikkut naalakkersuisup peqataasarnera.

Taanna aperaarput atorfilittami ilaat unammiuaarnermut aallartiinnarsimasinnaannginneraa.

- Isumaqarpunga tamanna pissusissamisuunngitsoq pingaaruteqarmammi taamatut issittuni nunani naalakkersuisooqatigiit naapittarneranni peqataanissaq pingaaruteqartoq. Aammalu taamatut aaqqissuussat timersornikkut annertutigisut nunatsinninngaanniit sinniisooqataaffigissallugit pingaaruteqarmata, Doris oqarpoq.

Aperaarput, taassuma angalasimanera pissutaalluni aningaasanut inatsisissap pingajussaaneerlugu oqaluuserineqarnissaa kalluarneqartoq taamatuttaaq allarpassuarnik kalluaasoq, tamannalu qanoq oqaaseqarfigisinnaaneraa.

- Oqaatigereerpara taamatut angalanissara siulittaasoqarfimminngaanniit naalakkersuisoqarfinninngaanniillu akuersissutigineqarnikuusoq, Kultureqarnermi naalakkersuisoq Doris Jakobsen taama oqarpoq. Taanna aamma oqarpoq, aningaasaqarnermut ataatsimiititaliap pisariaqartissimappanni oqarasuaatikkut attaveqaannarsimasinnaagaluartut.

Taamatuttaaq Kultureqarnermut naalakkersuisup angalanera peqqutaalluni aningaasanut inatsisissap oqaluuserineqarnissaata pingajussaaneerneqarnissaanut piffissaq sivikitsuinnaassasoq Ellen Christoffersenip aamma erseqqissaatigaa, neriuutigaali tamatuma oqaluuserineqarnissaanut angumersisinnaajumaassallutik.