Dorisip Sarallu Hækkerup ataatsimeeqatigaat
Eqqartuussivimmut suliassanngortitat ukiut ingerlanerini qaleriiaatiinnalersimasut 8000-it missaat qanoq iliornikkut ikilisarneqarsinnaanissaat ilaatigut eqqartorneqarpoq. Ministerip eqqoriarpaat ukiut marluk ingerlanerini tamakkerlugit suliarineqarsinnaassasut, tamannalu eqquutissappat ajornartorsiut alla anginerusorlu pilersinneqartussaassaaq.
Kalaallit pinerluuteqarsimasut eqqartuunneqarnermik pinerluuteqarsimasunut inissiisarfinnut utaqqisariaqalersinnaapput. Tamannalu Kangerlussuarmi utaqqiisaasumik pinerluuteqarsimasunut inissiisarfiup matuneqarnissaanik peqquteqarpoq. Pisariaqassappalli ammaqqinneqarsinnaasoq ministerip oqaatigaa.
-Utaqqisut amerleriataarsinnaanerinut ministerip pilersaaruteqareernera nuannaarutigisupilussuuara. Suliassanngortitammi qaleriiaaginnalersimasut pinerluuteqarsimasunik inissiisarfinnut utaqqisunut nuuginnassallugit iluaqutissartaqanngilaq. Kiisami aaqqiissuteqartoqalernera ajunngilluinnarpoq, Doris Jakobsen oqarpoq.
Sara Olsvigip Doris Jakobsenillu aaqqiissuteqarfigisariaqarsorisaat allat aamma Karen Hækkerupimut saqqummiunneqarput. Folketingimut ilaasortat marluusut ilaatigut Nunatsinni pinerluuteqarsimasunut inissiisarfinni arlalinni pissutsit naammaginanngitsut ilaatigut erseqqissaatigaat.
- Inatsisartut inatseqarnermut ataatsimiititaliaani ilaasortatut Nuummi pinerluuteqarsimasunut inissiisarfik pulaarparput, aamma Kulusummi isertitsivik siorna pulaarparput. Ukiut arlaqanngitsut qaangiuppata matoqqasumik inissiisarfiliortoqarnissaa nuannaarutigigaluarlugu Nunatsinni inissiisarfiit sinnerini pissutsinik aaqqinniagassaqartuarnera aamma erseqqissaatigaara, Sara Olsvig nassuiaavoq.