Folketingimini ammaanersiorluni ippassaq oqallittoqarnerani Lars Løkke Rasmussen oqarpoq, kalaaliaqqat 22-t pinngitsaalisaallutik 1951-imi Danmarkiliartitaasimanerat pillugu iternga tikillugu misissuisitsiumanani.
- Taakku kinaassusaat Danmarkip naalagaaffianit tillinneqarpoq. Nunasiaateqarnerup pissaanerisimasaata nunallu inuiisa akornanni saammaateqatigiinneq, Nelson Mandelamit isumassarsiaasoq, Australiamut Canadamullu siaruaassimasoq, tamatumani ilinniarneqarsinnaasimagaluarpoq, Doris Jakobsen tusagassiuutinut allappoq.
Doris Jakobsen Folketingimut ilaasortamut, Lars-Emil Johansenimut, maanna taartaagallarpoq.
Kalaaliaqqat 22-t, aamma Misiutitut taaneqartartut, Radioaviisimit aasaq sammigatsigik, Nunatsinni tusagassiorfiini qulequttani sammineqangaatsiarput. Kalaallillu kissaatigilerpaat pisoq iternga tikillugu misissorneqassasoq.
- Danmarkimi naalakkersuisut misissuisoqannginnissaa ilumooruppassuk, Namminersortut pisumik misissuisoqarnissaa piumasarisariaqarpaat, Doris Jakobsen oqarpoq. Taanna isumaqarpoq inuit taakku inuunerminni atugaat ammasumik ileqqorissaartumillu nassuiarneqartariaqartut.
Doris Jakobsenilli nuannaarutigaa, Kalaallit Nunaata CO2-mik aniatitsinerusalernissamik kissaateqarnera Lars Løkke Rasmussenip akuersaarpasimmagu.