Doris Jakobsenip suliffeqarfinni meeqqanut politikki ujartorpaa
Pisortat suliffeqarfiutaanni meeqqanut politikeqalernissaq anguniarlugu Naalakkersuisut peqquneqarnissaannik Inatsisartut aalajangiiffigisassaannik siunnersuut, 2008-mi Inatsisartut upernaakkut ataatsimiinneranni saqqummiunneqartoq, amerlanerusunillu akuersissutigineqartoq, maannakkut sumut killinnersoq Inatsisartunut ilaasortap Siumumeersup Doris Jakobsenip maanna naalakkersuisunut apeqqutigaa.
Allattoq Elisa Isaksen
aggustip 12-at 2009 13:19
Taassuma innersuussutigaa, taamanikkut naalakkersuisuusut, Siumumeersut Atassummeersullu akissuteqaataanni erseqqissaatigineqarmat, taamanikkut Namminersornerullutik Oqartussat sulisuminnut politikkianut ilanngullugu siunertaq taanna anguniarlugu suliarineqartoq. Aamma taamanikkut Namminersornerullutik Oqartussat Ataatsimoortumik Suleqatigiinnissamik Ataatsimiititaliaat aqqutigalugit suliaq ingerlanneqassasoq.
Meeqqanut politikki sulisunut politikkimut suli ilanngunneqarsimagunanngilaq. Taamaattumik Doris Jakobsenip § 36 najoqqutaralugu apeqquteqaammini paaserusuppaa, suliaq maannakkut sumut killissimanersoq.
