Doris J. Danmarkimi kalaallinut ilagiit sinniisaannik pilersitserusuttoq

Folketingimut ilaasortap Siumumeersup Doris Jakobsenip nunat atlantikup avannaamiut Folketingimut ilaasortaatitaasa ministeriunermut Helle Thorning-Schmidtimut ippassaq akunnermi apeqqarissaarnerini kalaallit Danmarkimi immikkut ittumik ilageeqalernissaat sulissutigerusunneraa akissutissarsiniaraluarpaa.
Allattoq Hagen Højer Christensen
maajip 13-at 2015 05:41
Nutserisoq Simon Uldum -

Ministeriunerup kalaallit ilageeqarnikkut immikkut sullinneqarnissaminnik kissaateqarnerat iluarisimaarnerarpaa kajuminnartillugulu, Doris Jakobsenilu kaammattorpaa danskit ilageeqarnermut ministeriannut saaffiginneqqullugu.

Taamaammat Doris Jakobsen danskit kultureqarnermut ilageeqarnermullu ministeriannut Marianne Jelvedimut saaffiginnissuteqarpoq, kalaallit ilagiit siinniisaannik ilageeqarfinnut aalajangersimasunut attuumassuteqanngikkaluarlutik inatsisit maanna atuuttut iluanni pilersitsisinnaanersut, kalaallit Danmarkimi siammaseqisumik najugaqarmata aammalu najugaqarfimminni ilaasortatut ilagiinnullu akileraarutinik akiliisarmata.

AAMMA ATUARUK Danmarkimi kalaallit ilageeqalernissaat politikkikkut taperserneqartoq

 

Kalaallit 20.000-it Danmarkimi najugaqarput

Doris Jakobsenillu apeqquteqaatimini tunngavilersuutigaa kalaallit Danmarkimi najugaqartut 20.000-it missaanniimmata, taakkulu ilarpassui ilagiinnut akileraarutinik akiliisarlutik. Danmarkimilu palasimik kalaallimik atorfinitsitsisoqarneranut atatillugu ilagiit sinniissaannik pilersitsinissaq kissaatigaat. Ajornartorsiutilli ilagaat Danmarkimi ilagiit sinniisaat ilageeqarfippasuarnut, sogninut, siammarsimanerat.

- Taamaammat ilageeqarfimmut aalajangersimasumut attuumasseqanngikkaluarluni ilagiit sinniisaannik pilersitsinissaq pisariaqartinneqarpoq. Tusarnikuuvaralu tusilartut ilageeqarnermi immikkut aaqqissuiffigineqarsimasut, ministerilu maanna qinnuigaara ilagiit kalaallit maani Danmarkimiittut assingusumik aaqqissuussiffigineqarnissaat aqqutissiuuteqqullugu, Doris Jakobsen Martianne Jelvedimut apeqquteqaatimini taama allappoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk