Doris Camp Century pillugu apeqquteqarpoq
Doris Jakobsenip paaserusuppaa Camp Centuryp sanaartorneqarnera danskit akuerisimaneraat, aammalu taassuma atomip nukinganik nukissiuuteqartinneqarnera danskit akuerisimaneraat. Kiisalu aamma paaserusuppaa Camp Century taassumalu atomip nukinganik nukissiorfianik danskit nakkutilliisimanersut.
Doris Jakobsenip paaserusuppaa suut peqqutigalugit, - danskillu piumasaqaataat qanoq ittut tunngavigalugit suliaqarfik taanna amerikamiunit isertugaasumik ingerlanneqarsimanersoq. Qanorlu amerikamiut Kalaallit Nunaata sermersuani sulluliarsuarmi nukissiorfik ikummatissat radiuaktiviusut atortoralugit suliaqarnissaminnut akuerineqarsimanersut.
-Ajoraluartumik Camp Centuryp nukissiorfigisimasaa atomip nukinga atorlugu ikummateqarsimasoq pillugu paasissutissat ersernerlupput. Maannalu Amerikamiut sakkutooqarfianniit kilomerinik untritillit arlallinnik ungasissusilimmi sermersuatsinni susoqarsimanersoq paasisariaqalerparput. Piffissamimi tassani Danmarkip naalagaaffeqarfiani Risø kisimi ikummatissanik radioaktiviusunik atuisinnaatitaagaluarpoq. Paasissutissat tamaaasa ilisimalernissaannut peqqutigaara siunissami ikummatissat radioaktiviusut nunami maani atorneqarneri pillugit nalornisoqannginnissaa, Doris Jakobsenip nunanut allanut ministerimut apeqquteqarluni ilaatigut taama allappoq.
