DONG nunatsinni uuliasiornissaminik aamma soqutiginnilerpoq
Danskit uuliasioqatigiiffiat DONG nunat allat assigalugit nunatsinni, pingaartumik tunup imartaani, uuliasiornissamik soqutiginnilerpoq. Taama ullumi allaaserisaqarput aviisi ullormut saqqummersartoq Børsen.
DONG ENERGY-mi pisortaq Anders Eldrup aviisimut oqarpoq, DONG siunissami nunatsinni uuliasiortunut akoorusuttoq, ilanngulluguli oqaatigalugu nunarput suliffigissallugu ajornartorujussuummat.
Immikkut ilisimasallit, uuliasioqatigiiffiit, aningaasaliisartullu, nunatsinni pingaartumillu tunup imartaani, annertuumik uuliaqarsinnaaneranik ilimagisaqarlutik oqaaseqartarnerisa kingunerisaanik nunatsinni uuliasiorsinnaaneq ulluni kingullerni oqallisigineqartorujussuuvoq.
US Geological Survey allaat kisitsisinik saqqummiivoq. Aningaasarsiorneq pillugu aviisimut Wall Street-imut ippassaq oqarput, tunup imartaani nappartat 110 milliardit tikillugit uuliaqarsinnaasoq. Ullumikkut uuliap akiinut sanilliutissagaanni aningaasanngorlugit 48.000 milliardi koruuninik naleqassallutik.
