Boltonip atuakkiaata saqqummersinneqarsinnaanissaata unitsinniarneqarnera eqqartuussisup itigartikkaa
USA-p naalagaaffiani isumannaallisaanermut siunnersortigisimasaata John Boltonip Det Hvide Husimiinnermini misigisani pillugit atuakkiaata saqqummersinneqannginnissaa pillugu USA-p inatsisinik atuutsinermut ministereqarfiata eqqartuussivitsigut suliassanngortitsinera USA-mi eqqartuussisut ilaata itigartippaa.
Aviisi The Wall Street Jorunal taama allaaserisaqarpoq.
Paasissutissat naalagaaffimmut pingaarutillit isertuunneqartariaqartullu John Boltonip atuakkiamini saqqummiunniarai inatsisinik atuutsitsinermut ministereqarfiup oqaatigaa, Boltonillu atuakkiaa tamanna pillugu saqqummitsaaliniarlugu.
Eqqartuussiviup tamanna akueraa, atuakkialli saqqummersinneqarsinnaanissaa inerteqqutiginiarnagu.
Paasissutissat uissuumminartut arlallit, præsidentimullu Donald Trumpimut pasilliutit arlallit John Boltonip atuakkiamini "The Room Where It Happened"-imi saqqummiuppai.
Atuakkiaq juunip ulluisa 23-anni saqqummersinneqartussaavoq, tusagassiorfinnullu assigiinngitsunut siammaterneqareerluni, Boltonillu oqaasii ilaatigut aamma issuarneqartareerlutik.
Eqqartuussiviup ullumi aalajangiinera pissutaalluni atuakkiaq marlunngorpat saqqummersinneqarsinnaalissaaq.