DMI: Immap sikua saanneruleriartorlunilu annikilliartorpoq
DMI-p issittup imartaa qaammataasakkut assilisatigut 1979-imili misissulerpaa. Immap sikua annikilliartortoq ukiuni 40-ni uuttuisarnerit takutippaat.
Issittumi immap sikua assersuutigalugu nunatta Canadamilu issittup qeqertaasa akornanni Baffinip Kangerliumanersuaniippoq. Ukiunilu kingullerni uuttuinerit imaq qaa - pingaartumik sinerissap qanittuani - kianneruleqqinnginnerani sikunnguutiivinneq ajortoq takutippaat. Sikuiuitsup sikutoqaa aasaanerani aassimanngitsoq ukiuunerani issunerulaaleqqittarpoq, uuttortaanerilli sikuiuitsup sikua ukiuni qulikkaani kingullerni saanneruleriartorlunilu annikilliartortoq takutippaat.
- Ilisimatuut sikuiuitsup sikua ukiullu ilaani sikuusarnera immikkoortittarpaat. Sikuiuitsup sikua tassaavoq aasaanerani aanneq ajortoq, ukiulli ilaani siku aasaanerani aattartuulluni.
- Sikuiuitsup sikua issittup imartaani pingaartumik ukunaniippoq: nunatta avannaani, Sibiriap avannaani, Alaskallu avannaani, taakkunanilu siku aanneq ajortoq aasat tamaasa 4-5 millionit kvadratkilometerinik annertuussuseqarpoq.
- Ukioq septembarimi oktobarimiluunniit aallartikkaangat imaq sikuunngitsoq qeriartulertarpoq.
- Tassa imaappoq anorip siku siornatigornit sukkanerujussuarmik nikisissinnaavaa, DMI-mi immap sikuanik ilisimatusartoq, Gorm Dybkjær oqarpoq.
Issittumilu sikuiuitsup sikua kisimi saanneruleriartorlunilu seqummalajartunngilaq. Ukiumimi sikuusarnera aamma sivikilliartoq ilisimatuup oqaatigaa.
Gorm Dybkjær Qaanaami ulluni makkunani misissuileruttorpoq, taassumalu nunatta avannaata sineriaa sinerlugu aamma taamaattoqartoq paasivaa.
- Piniartutoqqanik oqaloqateqaraangatta sikup 2 meterit tikillugit issussuseqartarnikuusimanera eqqaamasinnaanerartarpaat, tassalu maluginiagassaavoq, taanna ukiumi sikuuvoq aasaanerani aattartoq. Ukiuni kingullerni sikumik meterinnguamilluunniit issunerusumik uuttuinngilagut. Piniartut taamaammat sikumiittarnerat sivikilliartorpoq, Gorm Dybkjær oqarpoq.
Piniartutoqqanik oqaloqateqaraangatta sikup 2 meterit tikillugit issussuseqartarnikuusimanera eqqaamasinnaanerartarpaat, tassalu maluginiagassaavoq, taanna ukiumi sikuuvoq aasaanerani aattartoq.
Naak ilisimatuup silap pissusiata allanngoriartorneranik pisuutitsinissani mianersuukkaluarlugu Qaanaami siku decembarimi aalaakkaasunngorsimanngimmat angalanissani kinguartittariaqarsimavaa.
- Assersuuteqaannarpunga, oqanngilanga silap pissusiata allanngoriartornera pissutaasoq. Kisianni maannga Qaanaamut atortunik immap sikuanut decembarimi ikkussuiartortussaagaluarpugut, ukiunimi qulini taamaaliortarpugut. Sikuli aalaakkaasunngiorsimanngimmat taamaliorsinnaanngilagut, ilisimatooq oqarpoq.
Silalli pissusiata allanngoriartornera pissutaanerarusunngikkaluaraa Issittumi sumiiffinni qassiiusuni sikup saaliartornera piviusuuvoq.
Issittup kianneruleriartornera pissutaasoq, ilisimatooq oqarpoq.
- Seqernpup aasaanerani qinnngorneri siusinnerusumi sikup qaanit siusinnerusumi akisuttaraluarput. Imartunersuilli aasaanerani sikueruttut anneruleriartormata imarpissuaq taartorujussuanngortarpoq seqerngullu qinngorneranit pisarnermiit kissarnerungaatsialeriartarluni. Immallu qaava kissarunnaartinnagu sikujartorsinnaanngilaq.
Taamaammat sikuunnginnera sivisunerulerpoq, sineriammilu sikuusarnera sivikinnerulerluni.
Issittup imartaata sikua 2019-imi sikukinnerpaat aappaattut inissippoq. 2016-imilu immap sikua ukiumut agguaqatigiissillugu annikinnerpaavoq.
