Disko Linep pisortaa nassuertoq: Umiarsuaatileqatigiiffiup umiarsualivinni atugassarititaasut eqqummaariffiginerusimasussaagaluarpai
Disko Linep umiarsuaa nutaanerpaallunilu anginerpaaq Maliina Ittuk, innaallagiaq dieselilu atorlugit angalasinnaasoq, issittumut tulluarsagaasoq, naatsorsuuteqarfigineqangaatsiaraluarpoq.
Umiarsuaq ukiuni tallimani piareersarneqarpoq, angallassininilu siorna ukiakkut aallartippaa. Umiarsuaatileqatigiiffiulli Maliina Ittuk angallassiunnaartoq tallimanngormat nalunaarutigaa.
Tamanna Disko Linemi pisortap Michael Sloth Højgaardip ugguutigaa.
- Aalajangerneq ajornaatsuinnaananilu uggornarpoq, naatsorsuuteqarfigingaatsiarneqarnera pissutigalugu, nukippassuillu atorneqarnikuummata. Imarsiortugut pikkorissut peqatigalugit periarfissaasinnaasunik ujartuigaluarpugut, iluamilli iliuuseqarsinnaanata paasivarput, KNR-imit apersorneqarnermini taanna oqarpoq.
Maliina Ittuk Qaqortup Narsarsuullu akornanni maanna angallassivoq, Qaqortumilu mittarfittaassap apriilimi ammarnissaata tungaanut angallassigallassaaq.
Tamatuma kingorna umiarsuaq Qeqertarsuup Tunuanut nuunneqarnissaa pilersaarutaagaluarpoq, Ilulissat Qeqertarsuullu akornanni angallavik nuannarineqarluartumi angallassisussaalluni.
Taamaaliortoqarsinnaanngilarli, Maliina Ittuk Ilulissanut talissinnaanngilaq umiarsualivimmi pingaarutilinnik atortorissaaruteqannginnera pissutaalluni, pisortaq nassuiaavoq.
- Disko Linep umiarsuaatigeriigaaniit allanit anginerujussuuvoq. Umiarsuup Ilulissani Disko Linep umiarsuisa tulattarfianiissinnaanngilluinnarneranik pissuteqarpoq. Umiarsualivik atorneqangaatsiarpoq taamaalilluni umiarsuarmut inissaqanngilaq, taanna oqarpoq.
Tulluuttumik aaqqiissutissaqanngitsoq
Michael Sloth Højgaard nangilluni oqaluttuarpoq, umiarsuaatileqatigiiffik aaqqiissutissanik assigiinngitsorpaalunnik siunnersuuteqaraluarpoq. Disko Linep umiarsualiviliornissaa siunnersuutinut ilaavoq.
- Tamanna assigiinngitsunik pissuteqartumik iluatsinngitsoorpoq, ajoraluartumillu umiarsuaq naammassimmat isumannaatsumik ingerlasinnaajumalluta umiarsualivimmi pisariaqartunik atugassaqarnerluta maanna takusinnaanngilarput.
Maliina Ittup sanaartorniarneqarnera ukiut marluk kinguaattooreersimavoq. Coronap nalaani pilersuinermi ajornartorsiutit umiarsualiorfimmilu aningaasatigut ajornartorsiutit ilaatigut pissutaapput.
Umiarsuup Kalaallit Nunaannut aallartinneqannginnerani pissutsit misissoqqissaarnissaannut piffissaqarnikuunnginnassi?
- Piffissaqarluarnikuuvugut, piffissarlu taanna periarfissat assigiinngitsut tamaasa misissornissaannut aamma atorparput. Ukiut pingasut, sisamat atorlugit aaqqiissutissanik assigiinngitsunik suliaqarnikuuvugut, taakkulu aamma kommune Namminersorlutik Oqartussallu suleqatigalugit assigiinngitsumik suliarineqartarsimapput. Isumatusaartumilli aaqqiissutissarsinissaq iluatsinngitsuuippoq, Michael Sloth Højgaard oqarpoq.
Pisortaaneq nangippoq:
- Ima pisoqannginniassammat, umiarsualiornissap umiarsualiviullu inissaqartitsinera ataatsikkut isumannaarneqarsimanissaata pingaaruteqarluinnarnera, Disko Linep aamma eqqummaariffiginerusimasussaagaluarpai, taanna oqarpoq.
Issittumut atugassianngorlugu immikkut sanaaq
Umiarsuaatileqatigiiffik kujataani umiarsualivimmi tulaffissat tungaatigut aamma ilungersuuteqalerpoq. Inuttat, tamatuma malitsigisaanik, Maliina Ittuk unnuakkut ilaannikkut nuuttariaqartarpaat, tamannalu ulluinnarni ingerlatsinermut kinguneqartarpoq.
Tamanna ilutigalugu, mittarfissap nutaap ammarnerata kingorna ilaasut ikilinissaat, umiarsuaatileqatigiiffiup aamma naatsorsuutigaa. Taamaattumillu Maliina Ittuup kujataaniiginnarnissaa periarfissaanngilaq.
- Qaqortup Narsarsuullu akornanni maanna angalasartut, timmisartumut ilaasalerumaarmata angallassinerput taamaatiinnarneqassaaq. Taamaattumik angallatit mikinerit angallassinissamut naleqqunnerulissapput, taanna oqarpoq.
Maliina Ittuk qanoq pineqassanersoq suli aalajangerneqanngilaq.
- Umiarsuup qanoq atorneqarsinnaanera misissussavarput. Tunineqassanersoq attartortinneqassanersorluunniit,
Tuniniarneqassanersoq attartorneqassanersorluunniit, imaluunniit qanoq iliorumaarnersugut piffissap takutissavaa. Umiarsuaq issittumi atorneqartussatut immikkut sanaajuvoq. Taamaattumik allatut atorneqarsinnaanera killeqalaarpoq, issittoqarfimmi sikoqarfimmilu taamaallaat iluaqutaammat, pisortaq oqarpoq.
Sermitsiap allaaserisaa naapertorlugu, Maliina Ittuk Topas Explorer Groupimut, Disko Linemik piginnittumut, akisusimavoq.
Tusagassiuut 2024-mut ukiumoortumik naatsorsuutinik misissuisimavoq, umiarsuarlu 93 millionit koruunit missaannik naleqartutut tassani allaqqavoq.
