Disko II nunatsinni namminersortut pisiarerusuppaat

Disko II Qeqertarsuup tunuani angallasseqqileratarsinnaavoq.

Disko II namminersortunit nunatsinneersunit pisiariniarneqalersaarpoq. Piserusuttut ilaata Uummannami hoteliutillip Arne Niemanip, Disko II-p allanit pisiariniarneqalersaarnera ullaaq radiokkut tusaramiuk tupaallassimaqaaq ulappusersimallunilu. Arne Niemann neriuppoq ingerlatsivimmik pilersitsinissamut atatillugu Naalakkersuisunit piffissamik tunineqassalluni.

-Maani avannaani Aasianniit Uummannap tungaanut inuppaaluuvugut Disko II-mik pisinissamik soqutiginnilluta oqaloqatigiittartut. Umiarsuarmik ingerlatilissagaluarutta, takorloorparput takornariat nunatsinnilu angalasut ilaasorisalerumaarlutigit, Arne Niemann oqarpoq.

Umiarsuaq 22 millionit koruunit tungaanut nalilerneqarsimasoq akissaqartinneraat aperaarput:

- Isumaqarpunga akilersinnaassallutigu, ilimagilluinnarparalu Namminersornerullutik Oqartussat sullissinissamik isumaqatigiissuteqarfigisinnaassagaatigut, maanimi nunatsinni angallassineq ajornaatsuinnanngilaq, taamaattumik tapersersorneqarnissarput ilimangaara. Arne Niemannip neriuutigaa ingerlatsivimmik pilersitsinissamut atatillugu piffissamik tunineqarumaarlutik.

Disko II angallassilissangaluaruni Aasianniit Upernaviup tungaanut angalasassaaq.

Isumassarsiaq Upernaviup borgmesterianit Jens Immanuelsen-imit tapersersorneqarpoq.

- Assorujussuaq tapersersornarpoq, aamma innuttaasunit atorluarneqassagaluarpoq. Aamma piaartumik tapersiissuteqarnissarput naatsorsuutigineqassaaq. Innuttaasunummi angallannermut periarfissat annikipput, aamma meeqqat inuusuttullu angalluarsinnaanissaat pingaaruteqarpoq. Jens Immanuelsen naggasiilluni taama oqarpoq.