Dimitri Medjedevip ajugaanera isumaqatigiissutigaat

Dimitri Medjedev anginngitsunnguuvoq, qinngarinnittaasami aamma oqaatiginiarpaat Putin nammineq angivallaannginnami imminit anginerusumik præsidentinngortitserusussimanngitsoq, saniani soorpianngitsutut isikkoqalernissani nuannarinnginnamiuk. Putinili suli pissaaneqarallassaaq, præsidentinngortullu tamanna iluariinnassagunarpaa, malunnaatilimmimmi nutartereqqinniaranilu politikkikkut allanngortoqarnissaa anguniarnianngilaa, Putinillu manna tikillugu ingerlatsineratut ingerlatserusulluni. Medjedev Sct. Petersborgimi, Leningradimik taaguuteqarallarmat 60-ikkunni inunngorpoq, professorimik ataataqarluni ilinniartitsisumik anaanaqarpoq ukiullu tamaasa sunngiffeqarnerminni kiattunut angalasinnaasarsimallutik. Taamanikkulli nuutit nipilersortartunit assigiinngitsunit saqqummersinneqarsimasut nuannarisani, soorlu Led Zeppelin, Black Sabbat Pink Floydikkullu pisiarisinnaasarsaimanngilai. Dimitrilu ilisimatusarluarsimavoq, inuusuttuulluni Ruslandimi encyclopædi, nalunngittariaqakkanik paasissutissiinertalinnik imalik, atuagannaarisimallugu. Medjedev imminut tatigisuuvoq, inatsisilerituutut ilinniarsimalluni suliffissuaqarfiillu arlallit siulersuisuini ilaasortaasareerluni, naalakkersuisut siulittaasuannut tullersortaavoq, uuliamillu gassimillu suliffissuarmi, Gazpromimi, siulittaasuulluni.