DIH 140 millioni koruuninik aningaasaliiffigineqarpoq

Nakorsiartarfissamut nutaamut DIH-milu pilattaasarfittaassamut140 mio.kr.-nik aningaasaliisoqarpoq.

Nuummi Dronning Ingridip Napparsimmavissuani nakorsiartarfissamut nutaavimmut kiisalu pilattaasarfeqarfiup nakorsiartullu peruluttut iseqqaartarfiata nutaamik aaqqissuunnissaannut atorneqartussanik, siunertanut tamanut iluaqutaasussanut Aningaasaateqarfik, A. P. Møller og Hustru Chastine Mc-Kinney Møllers Fond til almene Formaal, 140 mio. kr.-nik aningaasaleeqqammerpoq.

-Aningaasaateqarfiup aningaasaliisimanerata tutsiunnera peqqinnissaqarfimmi assorsuaq nuannaarutigineqarlunilu qujamasuutigineqarpoq. Taama aningaasarpassuarnik tunissuteqarneq nunatsinni peqqinnissaqarfimmi nakorsartittartunut sulisuusunullu assut pingaaruteqartussaavoq, taama Peqqissutsimut Pisortaqarfimmi pisortaq Søren Rendal nalunaarpoq.

Nuummi Dronning Ingridip Napparsimmavissuani nutaamik nakorsiartarfittaarnissaq kiisalu pilattaasarfeqarfiup nakorsiartullu peruluttut iseqqaartarfiata nutaamik aaqqissuunneqarnissaat Dronning Ingridip Napparsimmavissuani sivisuumik kissaataasimapput, maannamulli anguneq ajornarsimallutik.

- Maanna taama tukkusaartigaluni tunissuteqartoqarneratigut Dronning Ingridip Napparsimmavissua suli annerungaartumik naammassisaqarfiusinnaanngorlugu, atuussinnaanngortillugu napparsimasunullu isumannaannerulersillugu aaqqissuuteqqinneqarsinnaalissaaq, Søren Rendal tusagassiuutinut allappoq.