Digital TV nuna tamakkerlugu atuutilingajalerpoq

Analogimik isiginnaarutikkut attaveqarneq matuneqarpat, digitaliusumik isiginnaarut atuutilissaaq. Digitaliusumillu isiginnaarsinnassagaanni atortut aaliangersimasut pigisariaqarput.

-Nutaaliaanngitsumik isiginnaaruteqaraanni digitaliusumillu isiginnaarsinnaassagaanni pisariaqassaaq dekoderitaarnissaq nutaamillu antennetaarnissaq pisariaqassaaq. Nutaaliaasumilli isiginnaaruteqaraanni nutaamik antennetaarnissaq kisimi pisariaqarsinnaavoq. Antennerigiigaq atuinnarneqarsinnaagaluarpoq, kisiannili nutaamik antennelinngikkaanni erseqqarippallaarnavianngilaq, Søren Friis Hansen, Attaveqarnermut, Silap pissusaanut nukissiuuteqarnernullu AC-fuldmægtigi taama oqaluttuarpoq.

Digitalisumik isiginnaarsinnaanissami paasissutissat annerusumik uani takusinnaavatit: www.tvnutaaq.gl

2012-mi aasap ukiallu ingerlanerani isiginnaarut digitaliusoq sumiiffinni makkunani atuutilissaaq.

Kujataa: Juli

Igaliku

Qassimiut

Sarloq

Tunu: Augusti/septemberi

Isortoq

Tiniteqilaaq

Kuummiut

Sermiligaaq

Kulusuk

Nerlerit Inaat

Avannaa:September/oktoberi

Siorapaluk

Taakku arlaanni najugaqaruit, isiginnaarsinnaajunnaarnissat pinngitsoorniarlugu nassitsissutip digitaliusup tigusinnaanissaanut piareersimanissat pingaaruteqarpoq. Nassitsissutit digitaliusut sumiiffinni aallakaatitsissutip analogiusup matuneqarnerinut peqatigitillugu atuutsinneqalertarput.

Qanoq ilioruma nassitsissut digitaliusoq aqqutigalugu KNR isiginnaarsinnaalissavara?

Inuit amerlanerit antennemik nutaamik kiisalu boksimik tigooqqaassummik, tassalu dekoderimik pisisinnaassapput. Aningaasartuutissalli katillugit 500-600 koruunit sinnernavianngilaat.

Atortunut pisiassannut fjernsynivit qanoq ittuunera aammalu antenneqarnerit apeqqutaasussaapput. Taamaattumik antennemik boksimillu tigooqqaassummik pisinialinnginninni atortut suut pisariaqartitannut naammannersut misissorluaqqaassagukkit pingaaruteqarpoq. Nalorniguit najukkanni radiunik tv-nillu tuniniaasartut attaveqarfigisinnaavatit.

Fladskærmsfjernsynimik MPEG-4-mik tigooqqaassuteqareersumik peqarpunga

Tigooqqaassummik pisissanngilatit, kisiannili antennemik pisisussaassaatit.

Antenne attavilerneqareerpat KNR ingerlaannartumik saqqummissaaq. Tamanna pinngippat fjernsynit kanalinik digitaliusunik nutaanik ujarlertissavat, imaluunniit boksimut tigooqqaassummut ilitsersuut malillugu inississavat.

Billedrørsfjernsynimik imaluunniit fladskærmsfjernsynimik MPEG-2-mik tigooqqaassutitalimmik peqarpunga

Boksimik tigooqqaassummik antennemillu pisissaatit.

Boksi tigooqqaassut antennelu ikkunneqarpata KNR ingerlaannartumik saqqummissaaq. Tamanna pinngippat fjernsynit kanalinik digitaliusunik nutaanik ujarlertissavat, imaluunniit boksimut tigooqqaassummut ilitsersuut malillugu inississavat.

Boksi tigooqqaassut qanoq ittoq pisiarissavara?

Boksimik tigooqqaassummik pisisussanngoruit suut pisariaqarnersut, aammalu suut saniatigut atortussatut, KNR-ip aallakaatitaanik tigooqqaanissamut pisariaqanngitsutut isigineqarsinnaanersut eqqumaffigissavatit.

Boksit tigooqqaassutit, tv-kkut aallakaatitanik MPEG-4-nik tigusisinnaasut tamarmik, tv-kkut aallakaatitanik digitaliusunik nutaanik tigusisinnaapput. TV-kkut aallakaatitat akornusersugaanngillat. Taamaattumik boksip tigooqqaassutip kortinik atuaassutitaqarnissaa pisariaqanngilaq.

Boksimik tigooqqaassummik pisinngikkaluarlutit fjernsynit tv-kkut aallakaatitanik nutaanik tigooqqaasinnaanersoq nalornigukku, tamanna fjernsynimut ilitsersuummi pigisanni takusinnaavat. Taanna amerlanertigut ”teknikkimut nassuiaatit” ataanni allassimasarpoq. Aamma najukkanni radiunik tv-nillu tuniniaasartut attaveqarfigisinnaavatit.

INI-p inissiaataani, Namminersorlutik Oqartussanit pigineqartuni, najugaqarfiit boksinik tigooqqaassutinik ataatsimoorlutik pisiniareerput. Tassalu INI-p inissiaataani Namminersorlutik Oqartussanit pigineqartumi najugaqaruit, nammineerlutit boksimik tigooqqaassummik pisissanngilatit, kisiannili INI-mut saaffiginnissallutit. Uani annertunerusumik paasisaqarsinnaavutit: www.ini.gl. 

Antenne qanoq ittoq pisiarissavara?

Tunngaviusumik antenne analogiusoq maannakkut atukkat atorsinnaanngilat. Imaassinnaavoq aallakaatitat digitaliusut tigooqqarsinnaagitit, kisiannili assit pitsaassusaat pitsaanerpaaq pissarsiarisinnaassagukku antennemik nutaamik pisisariaqarputit.

Pisuni amerlanerpaani antenne inimiitittagaq attavilik pisiarisinnaavat. Pisulli ilaanni antennemik silamiitittarissamik pisisariaqassaatit.

Pisariaqanngitsumik aningaasartuuteqarnissat pinngitsoorniarlugu antennemik pisinnginninni sanilinnut suleqatinnulluunniit qanoq iliorsimanersut paasiniarukku, imaluunniit najukkanni radiunik tv-nillu tuniniaasartut attaveqarfigigukkit ajunnginnerussaaq.

Namminerisamik inissiaatillit peqatigiiffianni najugaqaruit aamma antennemut ataatsimoorussamut aaqqiissuteqarnissamut periarfissat misissorsinnaavasi.