Dida saqqummersiteqqippoq

Dida nuuteeqqamik Ice Music Aps aqqutigalugu, Alex Andersen immiussisoralugu saqqummersitseqqippoq. Nuuteeraq taaguuteqarpoq ”Qanillivoq”, erinnanillu aqqanilinnik imaqarluni.
Allattoq Mads Pedersen
apriilip 02-at 2012 12:34

Erinnat taallallu inuunermut imminullu qiviarnermut tunngapput. Taallat eqqarsarnalaarsinnaasut, erinnallu sukkalaartut tusarnaarlugit tiguartinnarput sunnertinnarlutillu.

- Taalliama imarisai inuunermut qamuunalu ineriartornermut tunngasupilussuupput.  Inuunermi aqqusaakkanut ajornartorsiutinullu unittuuginnarnani misigissutsit tungaatigut ingerlariaqqinnissaq pingaartippara. Taallat uannut tunngasuupput, oqimaassinnaagaluarlutik aamma nukissanik tunisisinnaapput, Dida KNR.gl´imut oqarpoq.

Soorunami aamma erinnat taallallu quianalaarsinnaasumik ilaqarput. Erinnat ilaat ateqartoq ´YiiHaar`qiimanarluinnarpoq. Tassani kalaallit oqaasii pinnguariaatsit oqariartaatsillu quianalaatunngorlugit pinnguarineqarput. Erinaq taanna nuuteeraq saqqumminngitsorli facebookikkut tusaaneqarsinnaareerpoq nuannarineqarqalunilu.

Dida saqqummersitseqqaarpoq 2008-mi, taanna taaguuteqarpoq ”Nalunngiliuk?”. Massakkullu saqqummiussaanut sanilliukkaanni Dida inuttut misilittagaqarnerulersimanera malunnarpoq, erinniortut taalliortutullu ineriatrtorsimanera aamma tusaaneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq