Diamantisiortut Hudson Resources nunatsinni diamantisiornertik annertusivaat

Diamantisiortut Canadamiut Hudson Resources, nalunaarput, Kalaallit Nunaanni diamatisiornissami 16,4 millioni koruuninik aningaasaliissallutik.

Misissuinissarsuaq ukioq manna aallartinneqassaaq, diamantsisiortullu isumaqarput diamantisiorneq imminut akilersinnaajumaartoq, siusinnerusukkut Kangerlussuup kujasissuani Garnet Lake-mi nassaartoqareersimammat.

Diamantisiortut Hudson Resources, neriupput maannakkut taamatut iliornialernertik allanit isumassarsiffigineqarluni 11 millioni koruuninik aningaasaleeqqittoqarusulissasoq.

Ukioq kingulleq decembarip qaammataani Hudson Resources nalunaarpoq Kalaallit Nunaanni diamantimik angilaartumik nassaarsimallutik. Diamanti nassaarineqartoq 2,6 millimeterisut takitigaaq 2,3 millimeterinik silissuseqarluni 2,2 millimeterinillu portussuseqarluni.

Diamantip nassaarineqartup pitsaasusaa ajunngilluinnartutut nalilerneqarpoq, aappaluartumillu qalipaateqarpoq.