OL-Martin: OL-mut peqataassagaanni pilliuteqartariaqarpoq
OL-imullu peqataaneq Martin Møllerip nunani tamalaani unamminernut peqataanerisa kingullersarissagunarpaat.
Sotjimi OL-eqarneranit ukiut sisamat maanna qaangiupput, tamatumalu kingorna Martin Møllerip sungiusartarnini annertuseqqissimavaa inuunermini angusarissaarnerpaanissani neriuutigalugu.
Pitsaanerpaajussagaannili ilungersortariaqarpoq.
- Piffissamik annertuumik atuiffiuvoq pingaarnersiuisoqartariaqarlunilu, Martin Møller oqarpoq.
Nunanimi tamalaani ujakkaartartut pikkorinnersaat nallerniassagaanni tunulliuttariaqakkanik peqarpoq.
- Sorpassuit peqataaffigineq-ajorpakka. Ullut tamangarluinnangajaasa innajaartarpunga itiaartarlungalu, aamma sapaatit akunnerisa naanerini. Ullaakkut arfinernut sungiusariartarpunga, Martin Møller oqarpoq.
Martin Møller nuliaqarpoq marlunnillu meeraqarluni, taamaammat sapinngisamik angalavallaarnaveersaartarpoq Nuummilu sungiusarnissamut periarfissaasut atortarlugit.
Sapinngisamik sivisunerpaamik angerlarsimaniartarpunga, unamminerillu ujakkaartartutut iluatsitsiffigisinnaasakka kisiisa peqataaffigisarlugit.
AAMMA ATUARUK Talentarbejde skal skabe nye OL-atleter
Korea kujallermi ukiuunerani unammiuaarnerit peqataaffiginissaat Martin Møllerimut pingaaruteqartupilussuuvoq.
Ujakkaartartulli 37-nik ukiullip isertuutinngilaa OL naammassereerpat nunani tamalaani unamminernut peqataaqqinniarani.
- Aap, tamanna naatsorsuutigaara. Tassa OL, VM assigisaallu naggammik peqataaffigaakka. Angorusutara angusimallugu misigisimavunga, Martin Møller oqarpoq.
Korea kujallermi OL-ertoqarnera februaarip qulingiluaani aallartissaaq, Martin Møllerillu ujakkaarnermi unamminerit 15 kilometerimoortoq, 30 kilometerimoortoq 50 kilometerimoortorlu peqataaffigissavai.
Freestylemik sisorartartoq nunatsinneersoq Laila Friis-Salling OL-ertoqarnerani halfpipemik freestylemi unamminermut aamma peqataassaaq.
AAMMA ATUARUK Laila Friis-Salling OL-imi peqataasussatut toqqagaasoq
AAMMA ATUARUK Piareeqqavunga
